Ibi Guverineri Bosenibamwe yabitangaje kuri uyu gatatu tariki 24/09/2014 mu biganiro abayobozi batandukanye bagiranye n’abaturage bo mu Murenge wa Nkotsi, Akarere ka Musanze mu rwego rwo kwegera abaturage no kumva ibibazo bafite ngo bafatanye kubikemura muri uku kwezi kw’imiyoborere myiza.

Guverineri Bosenibamwe asobanura ko imiyoborere myiza ari iha amahirwe angana abanyagihugu kugira ngo bose bazamukire rimwe batere imbere.

Agira ati: “Imiyoborere myiza ni iha umunyagihugu agaciro, umuyobozi akabona umuturage nk’umuntu ufite agaciro. Yaba umuhanya n’umukire, twese dufite agaciro, iyo ni yo miyoborere myiza guha Abanyarwanda amahirwe angana, abana bose bakiga, amashuri ya 9 na 12 akubakwa, amavuriro akubakwa abaturage bakabona serivisi nziza kandi bafiteho uburenganzira.”

Mu murenge wa Nkotsi, Guverineri w’Amajyaruguru ari kumwe n’abashinzwe umutekano hamwe n’abakozi b’Ikigo cy’Igihugu gishinzwe Imiyoborere (RGB) basuye aharimo kubakwa Ishuri Rikuru ry’imyuga.

Umukuru w’Intara y’Amajyaruguru yabasabye abaturage kubyaza amafaranga ayo mahirwe y’ubuyobozi bwiza bubaka amazu y’ubucuruzi n’ay’amacumbi kuko bazakira abanyeshuri benshi n’abarimu bazakoramo. Ikindi abakangurira kuva mu buhinzi bwa gakondo bagahinga bya kijyambere kuko imiyoborere myiza atari amagambo gusa.

“Aya mahirwe y’imiyoborere myiza twahawe na Leta yacu tuyabyaze umusaruro dukire umuntu nagera hano abone muhinze neza. Imiyoborere myiza si amagambo turifuza ko imiyoborere myiza ijyana n’ibikorwa biha abaturage amafaranga ku buryo mu myaka ibiri imbere nta mutindi nyakujya waba ari muri Nkotsi,” Guverineri Bosenibamwe.

Uretse kuganiriza abaturage kuri gahunda zitandukanye za Leta kugira ngo abaturage nabo bazigire izabo ndetse banazigiremo uruhare, ubuyobozi bwumvishe ibibazo by’abaturage bugatanga inzira byakemurwamo.

Dativa Bazubafite, umuturage wo mu Murenge wa Nkotsi wagejeje ikibazo ku buyobozi, avuga ko iki gikorwa ari cyiza kuko ikibazo yari afite kuva muri 2010 none ubuyobozi bumweretse inzira azanyuramo kugira ngo gikemuke.

Ukwezi kwahariwe imiyoborere myiza ni igikorwa ngarukamwaka aho abayobozi basobanurirwa inshingano zabo mu kwimakaza imiyoborere myiza bakarushaho kwegera abaturage kugira ngo bumve ibibazo bafite bafatanye no kubishakira ibisubizo.

Nshimiyimana Leonard