Mu nkambi ya Kibabi, Gasenyi, Kinigi n’izindi nkambi ziterwa inkunga n’imiryango mpuzamahanga ngo abakozi b’iyi miryango bakorana n’abarwanyi bihishe muri izi nkambi mu bikorwa byo gucukura amabuye y’agaciro.

Hafashimana Patrick, umurwanyi wa FDLR wabaga ahitwa Kavuta mu nkambi ya Gasenyi, avuga na Kigali Today, avuga ko Abanyarwanda bari mu buhunzi ari benshi kandi bifuza gutaha ariko imbogamizi ikaba abarwanyi ba FDLR badashaka gusigara mu buhunzi bonyine hamwe n’imiryango mpuzamahanga idashaka kubura akazi n’ibikorwa by’ubucuruzi bw’amabuye y’agaciro bitabagoye.

Mu gihe ingabo z’umuryango w’abibumbye zishinzwe kugarura amahoro muri Repubulika iharanira Demokarasi ya Kongo, Monusco zishyirwaho igitutu mu kurwanya umutwe wa FDLR, ngo kimwe mu mbogamizi zo kurwanya uyu mutwe ni abaturage FDLR yagize igitambo kugira ngo itaraswaho.

Hafashimana avuga ko ubu inkambi z’impunzi zirimo Abanyarwanda hamwe naho batuye mu cyaro abarwanyi ba FDLR bimvanze nazo kugira batazaraswaho.

Atanga ingero, Hafashimana avuga ko mu nkambi yabagamo Gasenyi yari kumwe n’abandi barwanyi 85 nyamara ngo abo babanaga muri Kavuta bari 25 kandi bafite imbunda bahishe hamwe n’abayobozi babo, ku buryo igihe cyose bakenerwa FDLR ishobora kuza kuhabashakira.

Aba barwanyi ba FDLR ngo mu nkambi bafashwa nk’izindi mpunzi zose ndetse bagenerwa amahirwe arenze ayo izindi mpunzi zibona bitewe n’uburyo bakorana n’abakozi b’imiryango itera inkunga.

Mu nkambi ya Kinigi ngo habarirwaga abarwanyi ba FDLR bagera kuri 50 aba nabo babaho nk’izindi mpunzi uretse ko bagerekaho ibikorwa byo gushaka imari mu mashyamba n’amabuye y’agaciro.

Hafashimana avuga ko zimwe mu mari abarwanyi ba FDLR bagurisha abakozi b’imiryango mpuzamahanga zirimo amabuye y’agaciro ahenze ndetse ngo agurishwa abazungu.

Mu rugero atanga avuga ko mu kwezi kwa Nzeri 2012 ahitwa Gasopo abarwanyi ba FDLR bari bafite imari atabashize kumenya neza ariko yumvana bagenzi be ko ihenze. Iyo mari ngo hari ku wa mbere abakozi b’umuryango mpuzamahanga witwa Solidarités International baje kuyigura ariko ntibumvikana baragenda.

Hafashimana avuga ko abari baje kuvugana n’abarwanyi ba FDLR kuyigura harimo abazungu babiri n’umunyekongo umwe, gusa ngo ku wa gatanu haje abakozi ba OXFAM haza abazungu 3 n’umunyekongo umwe bahita bayitwara.

Iyi mari Hafashimana avuga ko atabashije kumenya neza kubera urwego yarimo yagurishijwe n’uwari umuyobozi wabo Capt Gérard Ndabiyeretse uretse ko avuga ko atari ryo zina rye kuko akunze guhindura amazina cyane.

Imikoranire ya FDLR n’imiryango mpuzamahanga ifasha impunzi mu burasirazuba bwa Kongo ngo igaragarira mu byo iyo miryango ifashamo abarwanyi ba FDLR birimo no kubahisha ikabaha ibikoresho.

Capt Ndabiyeretse niwe uyoboye abarwanyi ba FDLR bari mu nkambi Gasenyi aho afashwa nk’izindi mpunzi ndetse kubera ubucuti afitanye n’abakozi b’imiryango ibafasha ngo ahabwa n’ibirenze ibyo abandi bahabwa.

Nyamara igihe kinini ngo aba yagiye mu ishyamba rya Kilolirwe ku buryo abayobozi b’inkambi babizi kandi ntacyo bamukoraho ndetse n’iyo akeneye abarwanyi bamwe arabatwara.

Kuba hari abanyarwanda bari mu buhunzi ariko badataha ngo biterwa n’uburyo iyi miryango itabishaka kuko ibakuraho inyungu ndetse n’abarwanyi ba FDLR bakabuza abashaka gutaha kugira ngo itazasigara mu mashyamba yonyine, ibi bikaba byiyongeraho ko n’ushaka gutaha yihisha Atari ibyo ashobora no kubura ubuzima bwe.

Mu nama yabaye mu kwezi kwa Nyakanga i Walikale mu gikorwa cyo kwitegura ibitero FDLR ishobora kugabwaho mu gihe yanze gushyira intwaro hasi, zimwe mu nama zahawe abarwanyi ba FDLR kandi zatangiye gushyirwa mu bikorwa ni ukwivanga n’abaturage.

Abandi barwanyi bazanywe mu duce twegereye umupaka w’u Rwanda aho bivanga n’abaturage, abatuye Kibumba, Rugali na Karengera bavuga ko abarwanyi bamwe ubu bakora ibikorwa by’ubuhinzi n’ubucuruzi, ibi bakabifashwamo n’abandi barwanyi bahamaze iminsi babakira ndetse bakabafasha kubona ibyo bakora.

Mu nkuru Kigali today yakoze ivuga ko FDLR yahawe amahirwe yo kwihisha ibitero igomba kugabwaho igaragaza uburyo FDLR yatangiye ibikorwa byo kwihisha ibitero mu gihe ibigabweho hakaba hari ahantu hashyizweho hagomba kwakira abarwanyi bayo mu duce twa Rutshuru.

Mu duce twa Nyiragongo ishami rishinzwe iperereza muri FDLR rizwi ku izina rya CRAP ngo mu buryo bwo kwakira abarwanyi ba FDLR baza rikoresha abagore bacuruza Kibumba n’ahitwa Gisheke, Kirimanyoka na Kanyarucinya bagana Rusayo.

Abarwanyi bazanwa muri ibi bice bya Rutshuru na Nyiragongo ngo abadashoboye guhinga bajyanwa mu bikorwa byo gutwika amakara no kuyikorera kugira ngo agezwe ku mihanda aho imodoka zishobora kuyasanga.

Sylidio Sebuharara