Ibi yabivugiye mu Karere ka Rwamagana tariki 18/02/2015, ubwo yafunguraga amahugurwa y’iminsi ibiri yagenewe imiryango itegamiye kuri leta mu rwego rwo kuyongerera ubushobozi.

Prof. Shyaka yavuze ko kunenga ibitagenda na byo atari bibi kuko na byo ari uburyo bwo gukosora ahagaragaye amakosa, ariko anenga imiryango usanga nta gikorwa na kimwe ikora giteza imbere abaturage, ahubwo akazi ka yo kakaba kunenga ibitagenda gusa.

Yagize “Hari abantu bumva ko imiryango itegamiye kuri leta ari ukuvuga gusa, kunenga ibitagenda, ariko nyamara n’imiryango mvamahanga iri mu Rwanda ifite ibikorwa, iraza ikavuga ngo njyewe nzabaha amazi, nzigisha abantu gusoma, nzatanga ibikorwa by’ubuvuzi… Kuki imiryango yacu yo itagera kuri urwo rwego rwo kugira uruhare mu iterambere?”

Akomeza agira ati “No kuvuga [ibitagenda] ni uruhare mu iterambere, ariko kuza ukavuga ngo njyewe nzasakuza gusa? Ibyo bintu byo gusakuza gusa nkeka ko bitatugeza ku bunani”.

Aya mahugurwa ari muri gahunda leta y’u Rwanda yiyemeje yo kongerera ubushobozi imiryango itegamiye kuri leta muri gahunda y’imyaka irindwi (2010-2017) nk’uko umuyobozi wa RGB abivuga.

Ikigo cya RGB ni cyo cyahawe inshingano yo gutera inkunga ibikorwa byo kongerera ubushobozi imiryango itegamiye kuri leta, kuri ubu na cyo kikaba cyifashisha abafatanyabikorwa batandukanye kugira ngo ibyo bigerweho.

Umuyobozi wa UNDP akaba n’umuhuzabikorwa w’amashami y’umuryango w’abibumbye akorera mu Rwanda, Lamin M. Manneh avuga ko n’ubwo ibihugu byinshi bitabona agaciro k’imiryango itegamiye kuri leta, umuryango w’abibumbye uyifata nk’ikiraro kiganisha abaturage ku iterambere ari na yo mpamvu UN Resident ishyigikira ibikorwa byo kongerera ubushobozi imiryango itegamiye kuri leta.

Agira ati “Imiryango itegamiye kuri leta izwiho kugira uruhare runini mu iterambere ry’abaturage, by’umwihariko mu guteza imbere demokarasi. Ibihugu byinshi ntibibona agaciro k’imiryango itegamiye kuri leta, ariko twishimira ko leta y’u Rwanda ibona akamaro k’iyo miryango kandi igahabwa urubuga kugira ngo igire uruhare mu guhindura iki gihugu”.

Imiryango itegamiye kuri leta ivuga ko hari byinshi yungukira muri iyo gahunda ya leta yo kongerera ubushobozi imiryango itegamiye kuri leta, kuko uretse ko ayo mahugurwa aza yiyongera ku nkunga iyo miryango iba yaratewe kugira ngo ibashe gukora ibikorwa byo guteza imbere abaturage, nk’uko Uwimana Rose ukora mu muryango nyarwanda uharanira uburenganzira bwa muntu (Association de Volontaires de la Paix) abivuga.

Agira ati “Baduteye inkunga yo gukomeza umushinga wo gushimangira imibanire y’Abanyarwanda hagamijwe iterambere, tukaba twizeye ko aya mahugurwa azadufasha tukongera ubumenyi mu buryo bwo gukora ubuvugizi ku baturage mu kureba uko bava mu bibazo bakagera ku iterambere”.

Mu Rwanda hari imiryangango itegamiye kuri leta irenga 1000, ku buryo hataboneka ubushobozi buhagije bwo gutera inkunga iyo miryango yose nk’uko umuyobozi wa RGB abivuga.

Avuga ko iyo hari gahunda zo kongerera ubushobozi imiryango itegamiye kuri leta habaho kurushanwa.

Kuri iyi nshuro imiryango isaga 200 ngo yari yatanze imishinga izakora. Isaga ijana yari yujuje ibyangombwa bisabwa, ariko imiryango igera kuri 45 ni yo yari ifite imishinga iri hejuru yabonye amanota asaga 75%, ari na yo yatewe inkunga.

Biteganyijwe ko n’iyo miryango yindi izajya iterwa inkunga kuko leta y’u Rwanda yemera ko iyo imiryango itegamiye kuri leta ifite ireme byihutisha iterambere, nk’uko umuyobozi wa RGB abivuga.

Cyprien M. Ngendahimana