Nyuma y’imirimo yahise itangira yo kuyisibura, muri iki gitondo cyo kuwa kabiri guhera ku isaha ya saa tatu abagenzi bari bemerewe kongera kugenda.

Imodoka zatangiye kwemererwa guca mu muhanda wa Kigali-Muhanga ndetse n’uwa Kigali-Musanze wafunguwe.

Umupolisi ari kugenzura niba kunyuramo nta kibazo byateza.

Umunyamabanga wa Leta muri Minisiteri y’Ibikorwa remezo (MININFRA) Nzahabwanimana Alexis, yahise akorera urugendo i Runda mu Karere ka Kamonyi kugira ngo arebe aho imirimo igeze.

Nzahabwanimana yemeye ko imodoka zitangira kwambuka, kandi nawe ubwe yannyuzemo n’imodoka ye n’izindi ziboneraho ariko zigenda zigengesereye.

Nzahabwanimana ari kumwe na Minisitiri w’Abakoziba Leta Judith Uwizeye.

Abanyamaguru ntibaremererwa guhita n’ubwo amazi yagabanutse bigaragara. Kandi n’imodoka ntizirahitira igihe kimwe, kuko bisaba kubisikanya iziva Kigali n’iziva Muhanga.

Mu gitondo cyo kuri uyu wa kabiri tariki 10 Gicurasi 2016, Minisiteri ishinzwe kurwanya ibiza no gucyura impunzi yari yashyize ahagaragara itangazo rivuga ko iyi mihanda yabaye ifunzwe.

Uyu muhanda wa Kigali-Muhanga wari wafunzwe ariko mu gitondo cyo kuri uyu wa kabiri wafunguwe.

Ryagiraga riti “Kigali-Muhanga: uyu muhanda uracyafunze kubera ko amazi yisuka mu muhanda afite ingufu nyinshi. Inzego zibishinzwe zafashe umwanzuro w’uko ukomeza gufungwa mu rwego rwo gukumira impanuka ushobora guteza.

Kigali- Musanze: Uyu muhanda nawo nturafungurwa burundu. Igice cyo kuva Kigali-Gakenke nicyo kiri gukoreshwa. Kuva Gakenke kugera Musanze haracyafunze kubera inkangu zikigaragara mu gice kini cy’uwo muhanda, ndetse n’amazi yinjiye mu butaka bigaragara ko ashobora kongera gutengura imisozi.”

Minisiteri ishinzwe Ibikorwa remezo (MININFRA) kuva kuri uyu wa mbere irakora ibishobika byose ngo umuhanda Kigali-Musanze wongere ubwo nyabagendwa.

Kugeza ubu habaruwe abantu 50 bahitanywe n’ibi biza, Gakenke 35, Muhanga ni umunani, Rubavu ni bane na Ngororero batatu. Abakomeretse ni 26 , muri Gakenke ni 19 naho Muhanga ni barindwi. Amazu yasenyutse yo ni 587.

Biteganyijwe kandi ko kuri uyu wa kabiri tariki 10 Gicurasi 2016, ku bufatanye na Minisiteri y’Ubuhinzi n’Ubworozi bari bugenere inkunga zitandukanye zirimo n’ibiribwa imiryango yagizweho n’ingaruka z’ibiza.

MENYA UMWANDITSI

Jean Claude Munyantore

Umunyamakuru

@ MunyantoreC

Reba inkuru zose nanditse ( 2102 )