Gusenyuka kw’aya mazu kwatangiye mu munsi ishize ubwo hari hamaze iminsi hagwa imvura nyinshi maze kubera ko yubatswe mu buryo budakomeye atangira gusaduka ibikuta ndetse amwe ibikuta byatangiye kwikubita hasi; nk’uko byemezwa na Gatete Jean Paul, ukuriye abatuye muri uwo mudugudu.

Yagize ati “kuva twagera muri aya mazu muri Mata 2010 twayabayemo igihe gito maze ibikoni n’imisarane bitangira gusenyuka ku buryo ubu n’amazu yacu yatangiye gusatagurika none inkuta zimwe zayo zitangiye no kugwa”.

Gatete avuga ko abenshi muri uwo mudugudu badafite amikoro kuko bayafite bakwisanira amazu batarinze kwaka ubundi bufasha.

Ati “ nk’ubu igikuta cy’inzu y’uwitwa Uwiragiye Gilbert cyaraguye adahari kuko ari ku ishuri i Butare; icyo twakoze ni ukumubikira ibintu bye maze yazagaruka mu biruhuko tukabimuha mu gihe inzu ye itarasanwa tukareba aho twaba tumucumbikiye”.

Bamwe mu batuye muri uwo mudugudu ni abanyeshuri basiga bakinze amazu yabo bakazagaruka mu gihe cy’ibiruhuko kuko nta bandi bayasigamo dore ko ari imfumbyi zibana.

Icyo kibazo bagerageje ku kigeza ku buyobozi bw’umurenge wa Ntarama ndetse n’akarere ka Bugesera ariko bababwira ko bazagishakira umuti.

Umunyamabanga nshingwabikorwa w’umurenge wa Ntarama, Mukantwari Bertilde, avuga ko icyo kibazo bakizi ariko bakaba nta mikoro bafite ngo bagikemure ahubwo ikiri gukorwa ari ubuvugizi.

Ati “ twabakoreye ubuvugizi maze tubona abaterankunga bo kubasanira ubwiherero n’ibikoni kuko aribyo byari biteye ubwoba dore ko byari no gutera ingaruka ku buzima bw’abahatuye ariko turizera ko tuzanabona ababasanira amazu”.

Umudugudu w’amizero ugizwe n’amazu 38 ariko afite ikibazo gikomeye ni amazu 12.

Iyo witegereje usanga abubatse ayo mazu barakoresheje icyondo, ishwagara ndetse n’isima nke kuko iyo amazi aguye kuri ibyo bikuta bitangira gusaduka dore ko na fondasiyo zayo zarimbanguritse.

Egide Kayiranga