Ibi umuyobozi w’akarere ka Nyanza yabitangaje afungura amahugurwa agenewe abanyamabanga Nshingwabikorwa b’utugali twose tugize aka karere uko ari 51 mu muhango wabaye tariki 04/03/2014 muri Dayenu Hotel.

Mu kiganiro cye cyibanze ku myitwarire ikwiye kuranga abayobozi yagarutse ku byaha bimwe na bimwe bivugwaho abo banyamabanga Nshingwabikorwa birimo ruswa n’ibindi byaha bifitanye isano nayo ndetse no kugurisha rwihishwa ibiti bya Leta avuga ko bene abo bayobozi kuri we adashobora kubihanganira. Ati : « Ikosa ryo ndaryihanganira ariko icyaha cyo sinacyihanganira ».

Uyu muyobozi w’akarere ka Nyanza yakomeje avuga ko mu makosa yakwihanganira arimo nko gukererwa inama ndetse no kuba havutse ukutavuga rumwe hagati y’abayobozi ubwabo batumva ibintu kimwe akabahuza.

Ngo kuri we ibi yabyihanganira kuko ari amakosa ariko ngo uwaba akekwaho ruswa we ubwe yamutanga akazagaruka mu mirimo ye ari uko icyo cyaha agihanaguweho n’inkiko.

Aganiriza aba bayobozi b’utugali muri iki kiganiro yabahaga kijyanye n’imyitwarire ikwiye kubaranga yavuze ko hari bamwe bashobora gutabwa muri yombi mu minsi mike iri imbere niba bataretse ibyaha bari kwishoramo.

Yagize ati : «Muri iyi minsi duhanganye n’ikibazo cy’ibiti byitwa imisheshe bigenda byibwa mu mu mirenge itandukanye y’akarere ka Nyanza ariko ikigaragara n’uko hari abayobozi bo mu nzego z’ibanze bihishe inyuma y’ubujura bw’ibyo biti bya Leta ».

Yavuze ko mu yindi mirenge icyo kibazo cy’ubujura bw’ibyo biti cyahagurukiwe ndetse ubu kikaba kiri mu marembera ariko ngo mu murenge wa Kibilizi kiracyariyo kuko hari bamwe mu bayobozi b’utugali twaho bagikingira ikibaba abaza kubigura baturutse mu gihugu cya Uganda aho bujyanwa bivuye mu Rwanda.

Asobanura uburyo ibyo biti by’imishikiri bishobora gushyirisha mu buroko bamwe mu bayobozi b’utugali yasobanuye ko hari bamwe muri bo baba bafitanye gahunda n’abaza kubigura ngo nibo babaha amakuru bakabamenyesha aho irondo riri maze ibiti bikibwa bikarinda bigezwa mu bihugu by’abaturanyi badafashwe.

Umuyobozi w’akarere ka Nyanza, Murenzi Abdallah, ntiyatinye kugira uwo atunga agatoki muri icyo kiganiro kuko yagaragaje mu ruhame ko umuyobozi w’akagali ka Rwotso mu murenge wa Kibilizi mu karere ka Nyanza natitonda ibiti byitwa imisheshe bizamushyirisha mu gihome agafungwa.

Atanga iki kiganiro ku myitwarire ikwiye kuranga abayobozi yasabye abanyamabanga Nshingwabikorwa b’utugali kwitwara neza bakihesha agaciro ndetse ntibagire umuturage barenganya cyangwa ngo bamuhohotere.

Mu gihe cy’iminsi itatu aba banyamabanga Nshingwabikorwa b’utugali bazamara bahugurwa bazaganirizwa ku ngingo nyinshi zitandukanye zirimo uko barushaho kurangiriza imanza ku gihe ndetse no kugira indangagaciro zikwiriye umuyobozi nyawe.

Jean Pierre Twizeyeyezu