Isuku nke yongeye kugaragara ku baturage batuye mu duce dutandukanye tugize intara y’amajyaruguru, ku buryo harimo n’abakirwaye amavunja n’abadafite ubwiherero, nk’uko inama y’umutekano y’Intara y’Amajyaruguru yabaye mu ntangiriro z’uku kwezi yabigaraje.

Umuyobozi w’Akarere ka Gakenke Nzamwita Deogratias, yasabye abaturage kurushaho kugira isuku, kuko mu minsi ishize bari baragerageje kuyihagurukira ariko bakaba bongeye kudohoka kunshingano zo kuyitaho kuko hari abagifite amavunja muri aka karere kandi bidakwiye.

Yagize ati “Nta muturage wa Gakenke wo kugira amavunja nta muturage wa Gakenke wo kutagira ubwiherero, santere nka Gakenke n’izindi santere nta kuntu hataba harimo isuku kuko hari n’amaresitora nahandi inyuma basanze hatameze neza.”

Abaturage nabo basobanura ko usanga abayobozi mu nzego z’ibanze hamwe n’abashinzwe ubuzima, badakunze kugera hasi mu biturage ngo babakangurire isuku aribyo bikurura amavunja.

Uwiragiye Silvan wo mu Murenge wa Gakenke, avuga ko impamvu isuku nkeya ikunze kugaragara akensi abayobozi babigiramo uruhare.

Ati “Ahanini biva mu miyoborere y’inzego z’ibanze hamwe n’abanyabuzima kuko badakunda kwita mu giturage bajya kugenzura buri rugo bigakurura amavunja kuburyo inzego z’ibanze zidafata icyemezo ngo babikangurire abaturage buri munsi, kandi imidugudu myinshi akagoroba k’abagore mu nama baravuga ngo baragakora ariko haba n’amezi atatu ashira ntako bakoze.”

Bamwe mubaturage bakaba bafite ingamba zo kugirango batazongera kugaragaraho isuku nkeya.

Nirere Jacqueline utuye mu murenge wa Nemba avuga ko bagiye kugerageza bagashaka uburyo amavunja acika.

Ati “Tugiye kugerageza dushake ukuntu ayo mavunja yaducikaho twisukure duce umwanda, dukubure, twubake n’umusarani usakaye n’ingarani tuyubake maze tuvome n’amazi tumene mu nzu turebe ko iyo suku yagaragara.”

N’ubwo abaturage bavuga ko abayobozi mu nzego z’ibanze batabegera ngo babigishe ariko usanga harimo n’abagifite imyumvire mike, ku buryo bavuga ko kutagira isuku babiterwa n’ubukene.

Abdul Tarib