Bamwe mu bahoze ari abakozi ba Leta mbere ya 1994 biganjemo abari abarimu n’abahoze ari abayobozi ba za komini bari bamaze igihe bishyuza amafaranga yabo bashobora kuyabona mu minsi iri imbere.

Minisiteri y’imari n’igenamigambi isaba abo bahoze ari abakozi kwerekana lisiti bahemberwagaho, ndetse n’amabaruwa yabashyize mu kazi ariko bamwe mu badepite n’abayobozi bakuru b’urwego rw’umuvunyi basanga gusaba umukozi w’icyo gihe ibaruwa yamushyize mu kazi cyangwa liste yahemberwagaho ari ukumunaniza, kuko ngo benshi batabihabwaga bitewe n’imikorere y’ubuyobozi bwariho icyo gihe.

Depite Mukarugema Alphonsine avuga ko kwaka abo bakozi impapuro nk’izo ari amananiza kuko abenshi bahembwaga mu buryo rusange cyangwa bagahabwa akazi badahawe amabaruwa, kuri ibyo hakiyongeraho n’ikibazo cyo kubika izo mpapuro mu bihe by’intambara na Jenoside yabaye mu Rwanda.

Bernadette Kanzayire, Umuvunyiwungirije, avuga ko urwego rw’umuvunyi rugiye gukorana n’izindi nzego kugira ngo abo bantu babone ibyo amategeko abemerera.

Ernest Kalinganire