Abigira ububaruramari bw’umwuga n’ubufasha mu by’ibaruramari ngo ntibaragera kuri 500 mu gihugu, nyamara buri kigo cyangwa umuntu wese ufite ibikorwa bikeneye gutezwa imbere ngo yagombye kugira umubaruramari, nk’uko Georgie Iradukunda, ushinzwe ibizamini muri ICPAR yabitangaje, ubwo bamwe bakoraga ibizamini kuri uyu wa 10/6/2014.

Iradukunda avuga ko ababaruramari b’umwuga mu Rwanda batarenga 295; aba akaba ari ababifitiye icyemezo mpuzamahanga gitangwa na ICPAR (Institute of Certified Public Accountants of Rwanda) cyangwa ibindi bigo nkacyo byo mu mahanga.

“Ni gute umunyamahanga yitwaza icyemezo cy’ububaruramari bw’umwuga, akadutwara imirimo twagombye kwikorera! Hari aho avuga ko kugira ngo agenzure anatange raporo ku miterere y’imari yawe, aguca amafaranga kugera kuri miliyoni ebyiri, nyamara icyo akora kitarenza isaha imwe; hari n’abaca miliyoni eshanu ku igenzurwa ry’akantu kamwe gusa”, Iradukunda.

Uwitwa Ngiruwonsanga Leandre ukorera muri banki ya AB, yavuze ko amasomo ya ICPAR azamufasha kwandika neza ibyo akora no kumenya ko akora yunguka; kandi ko umubaruramari w’umwuga ari we waba umucuruzi mwiza, kuko ngo amenya neza ibyo za mashini za EBM zitanga inyemezabuguzi zikora.

Ikigo ICPAR kivuga ko mu gutanga akazi k’ibaruramari mu Rwanda mu bihe bizaza, inzego zitandukanye zizajya zishingira ku cyemezo gitangwa n’icyo kigo, nk’uko ngo mu bindi bihugu cyangwa mu bigo mpuzamahanga bikorera mu Rwanda icyo cyemezo gikenerwa.

Kuva ku cyiciro cya mbere cy’amasomo y’ubufasha mu by’ibaruramari kugera ku bubaruramari b’umwuga, ngo higishwa amasomo 18 ategurwa na iCPAR, akigishirizwa mu mashuri makuru na za Kaminuza mu Rwanda mu gihe cy’imyaka itatu. ICPAR ni nayo itanga ibizamini biri ku rwego mpuzamahanga rwitwa International Federation of Accountants (IFAC), ruhuza ababaruramari bo mu bihugu hafi ya byose byo ku isi.

Ibiciro byashyizweho mu kwishyura ibizamini bya ICPAR byose umuntu akora, hamwe n’ibitabo ngo ntibirenza amafaranga ibihumbi 800 y’amanyarwanda; ariko aya akaba ari ayiyongera ku mafaranga y’ishuri asabwa muri za kaminuza n’amashuri makuru.

Ikigo cya ICPAR cyashyizweho n’itegeko ryo mu mwaka wa 2008, aho Leta ngo yabonaga hari ikibazo cyo kubura ababaruramari b’umwuga bafasha mu bugenzuzi bw’imari ya Leta ikunze kunyerezwa; ndetse ko hari n’ibigo bisaba ababaruramari bujuje imyitwarire n’ibipimo mpuzamahanga.

Simon Kamuzinzi