Iki gikorwa cyakorewe ku cyicaro cy’intara y’Iburasirazuba tariki 23/08/2013, aho komisiyo y’igihugu y’amatora yerekanye abakandida 26 b’abagore bahatanira imyanya 6 amategeko yemerera abagore bo mu ntara y’Iburasirazuba bazaba bahagarariye bagenzi babo mu nteko ishinga amategeko muri manda y’imyaka itanu itaha.

Muri uwo muhango, aba bakandida beretswe abayobozi b’inzego z’ibanze mu turere twose tugize intara y’Iburasirazuba bari bateraniye ku cyicaro cy’intara, babamenyesha amabwiriza agenga abiyamamariza ubudepite mu Rwanda, ibyo bemerewe n’ibyo babujijwe kandi basaba abayobozi b’inzego zose za Leta kuzabafasha kwiyamamaza neza uko amategeko abiteganya.

Muri uyu muhango kandi harimo abayobozi bakuriye inzego z’umutekano mu ntara y’Iburasirazuba, aho bijeje abiyamamaza n’abayobozi ba komisiyo y’igihugu y’amatora ko bazacunga umutekano neza mu kwiyamamaza no mu matora nyirizina, abiyamamaza n’Abanyarwanda bazitabira amatora bakazaba barindiwe umutekano neza.

Visi perezida wa komiisiyo y’igihugu y’amatora, madamu Ndahimana Kibasanga Marie Odette yabwiye abakandida ko komisiyo y’igihugu y’amatora yiteguye bihagije, ariko ikaba ishaka ko batazahirahira ngo bace ku ruhande amabwiriza yagenwe azagenga amatora kuva mu kwiyamamaza kugera igihe cyo kuzatangaza amajwi.

Umukozi ushinzwe guhuza ibikorwa bya komisiyo y’igihugu y’amatora mu ntara y’Iburasirazuba, Kayiranga Rwigamba Frank yabwiye Kigali Today ko abiyamamariza kuzahagararira abagore b’Iburasirazuba mu nteko ishinga amategeko bazatangira kwiyamamaza ku itariki ya 27/08 mu karere ka Rwamagana, bakazasoreza mu karere ka Kirehe kuwa 13/09/2013.

Uko baziyamamaza mu turere tugize intara y’Iburasirazuba biteye bitya:

Rwamagana: kuwa 27 na 28/08/2013,

Bugesera: kuwa 29 na 30/08/2013,

Nyagatare: kuwa 31/08 na 01/09/2013,

Gatsibo: ku matariki ya 03,04 na 05/09/2013,

Kayonza: kuwa 06 na 07/09/2013,

Ngoma: kuwa 09 na 10/09/2013,

Kirehe: kuwa 12 na 13/09/2013.

Ahishakiye Jean d’Amour