Ibihugu byahurijwe hamwe n’umuryango nyafurika uteza imbere ubushakashatsi mu by’ubuhinzi (FARA), byashimye ko u Rwanda rufite gahunda zo kwigiraho zo guteza imbere ubuhinzi no kwihaza mu biribwa; nk’uko umuyobozi wa FARA, Prof. Monty Jones, yatangaje.

“Kuri ubu hari ibihugu birenga 22 twavuga ko bifite ikibazo cyo kutihaza mu biribwa; u Rwanda ntabwo rurimo, niyo mpamvu yo kuza kureba uko rwitwaye”; nk’uko Prof. Jones yabitangarije mu nama y’iminsi itatu yo kungurana ibitekerezo kuri gahunda z’ubuhinzi iteraniye i Kigali guhera kuri uyu wa kane tariki 06/9/2012.

Umuyobozi w’umuryango FARA avuga ko we na bagenzi be bazafata umwanya wo gusura ibice bimwe na bimwe biberamo ubuhinzi, bakareba imitunganyirize y’ubutaka buhingwaho, ibikorwa remezo bijyanye n’ubuhinzi, ndetse bakanaganira n’abahinzi.

Ministiri w’ubuhinzi n’ubworozi, Dr.Agnes Karibata, nawe yashimangiye ko hari byinshi abahagarariye ubuhinzi mu bihugu bitandukanye bazafataho urugero.

Dr.Karibata yavuze ati: “Nyuma y’imyaka itagera kuri 20 igihugu kimaze kigize ibibazo, ntabwo twicaye ngo turekere aho. Aba bashyitsi bazajya kureba amaterasi, ibishanga bitunganijwe, ibikorwaremezo byo kuvomerera, imashini z’ubuhinzi ndetse banaganire n’abahinzi babigize umwuga.”

U Rwanda rurateganya ko abantu batagira ubutaka, cyane cyane urubyiruko, nabo bazagira uruhare mu buhinzi bakoreshe ikoranabuhanga; nk’uko Ministiri Kalibata yasobanuye ubwo yari amaze gutangiza inama mpuzamahanga yiga ku buhinzi.

Muri gahunda y’imbaturabukungu (EDPRS) ya mbere, Abanyarwanda basaga miliyoni imwe bavuye munsi y’umurongo w’ubukene. Ubuhinzi n’ubworozi nibyo byazamuye igice kinini cyane cy’abaturage, nk’uko Ministiri Kalibata yabitangaje.

Simon Kamuzinzi