Byagarutsweho na Minisitiri w’Intebe w’u Rwanda, Dr. Edouard Ngirente ku mugoroba wo ku wa Kabiri tariki 14 Ugushyingo 2023, ubwo yatangizaga ku mugaragaro inama y’Ihuriro ry’Ubuyobozi bw’Inzego z’ibanze (CLGC2023), irimo kuba ku nshuro yayo ya 10.

Ni inama y’iminsi ine irimo kubera i Kigali mu Rwanda, ikaba ihuje abahagarariye inzego z’ibanze baturutse mu bihugu 56 bigize umuryango wa Commonwealth, amashyirahamwe y’inzego z’imitegekere y’ibihugu, sosiyete sivile, ba Guverineri n’abandi batandukanye bafite aho bahuriye n’inzego z’ibanze.

Atangiza iyi nama ku mugaragaro, Minisitiri w’Intebe Dr. Ngirente, yavuze ko icyorezo cya Covid-19, imihindagurikire y’ibihe ndetse n’amakimbirane byakomye mu nkokora za Leta mu bikorwa bitandukanye by’iterambere.

Ati “Hari raporo zerekana ko ibihugu bigize umuryango wa Commonwealth byagize igihombo kingana na Miliyari zisaga 1000 z’Amadolari y’Amerika, ku musaruro mbumbe wabyo mu mwaka wa 2020, ugereranyike n’uko byari biteganyijwe mbere ya Covid-19.

Minisitiri w’Ubutegetsi bw’Igihugu w’u Rwanda, Jean Claude Musabyimana, avuga ko inama nk’iyi ari umwanya mwiza wo kugira ngo abantu bahure basangire ubunararibonye bafite, ibibazo ndetse n’ibisubizo, hagamijwe kugira ngo bafashe b’ibihugu bigize umuryango wa Commonwealth kubaho neza.

Ati “Inzego z’ibanze icyo tubereyeho ni ukugira ngo abaturage duhagarariye, tuyobora, bagire uruhare mu miyoborere yabo, kandi itume bashobora kubaho neza no kubona ibisubizo ku bibazo bafite. Ubu rero tuba tuganira kugira ngo twungurane ibitekerezo kandi dufatire hamwe ingamba zo gukemura ibibazo bigaragara mu bihugu byacu.”

Umuyobozi w’Ihuriro ry’inzego z’ibanze muri Commonwealth, Rev Mpho Moruakgomo, avuga ko bagomba kugira ubushake bwo kwegereza abaturage ubuyobozi n’ubushobozi, kugira ngo babashe kwifatira imyanzuro.

Yagize ati “Inzego z’ibanze zigomba guteza imbere Demokarasi kubera ko nta yandi mahitamo, abaturage ni bo shingiro ry’iterambere ryabo, kuko ni bo bazi icyo bifuza. Kubera iyo impamvu, tugomba kugira ubushake bwo kwegereza abaturage ubuyobozi n’ubushobozi, kugira ngo babashe kwifatira imyanzuro, bityo bikagabanya gutegera abandi amaboko.”

Biteganyijwe ko iyi nama izarangira ku wa Gatanu tariki 17 Ugushyingo 2023. Ubusanzwe iyi nama iba buri nyuma y’imyaka ibiri, ariko icyorezo cya Covid-19 kikaba cyaratumye itabera igihe yari yarateganyirijwe, kuko yaherukaga kubera mu gihugu cya Malta cyo ku mugabane w’u Burayi muri 2017, aho yari yabanjirijwe n’iyabereye ku mugabane wa Afurika mu gihugu cya Botswana, muri 2015.