Nkuko bigaragazwa n’icyegeranyo cyakozwe n’impugucye zateguye igenamigambi ry’umuryango wa CEPGL 2013-2020, biboneka ko ikibazo cy’imiyoborere n’umutekano biri mubibangamira iterambere ry’ibihugu bigije umuryango wa CEPGL.

Nubwo bigaragazwa ko hashakwa ibisubizo bitandukanye mu gushakira amahoro akarere, impugucye zigaragaza ko umuti urambye w’ibibazo uherereye ku miyoborere myiza no guteza imbere iterambere, abaturage bagashobora kwibona mu buyobozi, guhanga imirimo hamwe no guca imitwe yitwaza intwaro na ruswa.

Izi mpugucye zigaragaza ko guteza imbere imiyoborere myiza no kugarura amahoro byafasha abaturage batuye mu muryango wa CEPGL kwiteza imbere hagendewe ku mahirwe ahari, yaba mu bucuruzi bwambukiranya imipaka, kongera ingufu z’amashanyarazi mu karere hamwe no guteza imbere imishinga y’ubuhinzi.

Umunyamabanaga wa CEPGL, Tuyage Herman, nawe yemeza ko ibibazo by’umutekano mucye n’imiyoborere myiza bibangamira iterambere rya CEPGL kuko bituma abaturage batisanzura mu mikorere ndetse n’abashoramari ntibizere akarere.

Cyakora ngo uko iminsi ihita biragenda bitanga ikizere mu guteza imbere imiyoborere myiza no kurwanya ruswa hamwe no gushakira umutekano akarere.

CEPGL irategura igenamigambi ishingiye ku byatuma abatuye akarere bashobora kwiteza imbere mu bukungu, amahoro n’umutekano, bimwe mu bikorwa yari yaratangiye birimo ingufu z’amashanyarazi ahuriweho n’ibihugu bigize uyu muryango, guteza imbere ibikorwa remezo nk’imihanda ihuza imipaka hamwe no korohereza abambukiranya imipaka bakora ubucuruzi.

Taliki 15/06/2013 nibwo abahawe akazi ko gutegura igenemigambi ry’imyaka irindwi barimo sosiyete yitwa TRANSTEC bagaragaje uko ibihugu bihagaze nibyo bicyeneye ngo bishobore gutera imbere.

Mu byagaragajwe nk’ibisubizo ku iterambere rya CEPGL harimo gushakira umuti urambye imitwe yitwaza intwaro, guteza imbere imiyoborere myiza, gucyemura ikibazo cy’impunzi n’amakimbirane, kurwanya ruswa hamwe no gushyiraho pilitiki ifasha urubyiruko kubona imirimo.

Umuryango wa CEPGL ugizwe n’ibihugu bitatu aribyo u Rwanda, u Burundi na Repubulika Iharanira Demokarasi ya Congo.

Sylidio Sebuharara