Inyubako irimo laboratwari za PIASS

Ni Laboratwari izifashishwa mu kwigisha abaziga muri ariya mashami, ariko n’abayituriye bagashobora kuzayiyambaza nk’uko bivugwa na Prof Penina Uwimbabazi uyobora iri shuri.

Agira ati “Turifuza ko n’abatari abanyeshuri, urugero nk’ibigo bya WASAC bipima amazi, ibigo bipima ubuziranenge bw’ibyo kurya byajya biyifashisha. Abakeneye kubaka, abakeneye gupima ubutaka, nduma bajya bifashisha laboratwari zacu.”

Guverineri w’Intara y’Amajyepfo, Alice Kayitesi, yifatanyije n’iri shuri mu gutaha iriya Laboratwari. Yashimye kuba izifashishwa mu gutanga ubumenyi bukenewe ariko no gufasha Abanyarwanda mu gukemura ibibazo binyuranye.

Ati “Iyi laboratwari izafasha mu gutanga ubumenyi ku bana bacu, baba abo mu Ntara y’Amajyepfo n’abaturuka hirya no hino mu gihugu. Kandi no mu bufatanye dusanzwe tugirana n’amashuri, izadufasha mu gukemura ibibazo bimwe na bimwe bijyanye n’ubutaka.”

Guverineri w’Intara y’Amajyepfo, Alice Kayitesi, yatashye laboratwari yo muri PIASS

Abanyehuye bumvise iby’iyi laboratwari barabishimye, kuko batekereza ko abakeneye serivise itanga bazazibona hafi.

Immaculée andutirabose ati “Urumva abaziga bifashishije iriya laboratwari bazavamo abatekinisiye biyongera ku basanzwe, kubabona bizajye byoroha. Ntekereza kandi ko n’ibiciro byo gupima bizagabanuka kuko habonetse abiyongera ku basanzwe babikora.”

Damascene Barajiginywa utuye hirya gato y’umujyi wa Huye na we ati “Hano mu cyaro natwe dukeneye kubaka inzu za etaje, kandi mbere yo kubaka hakenewe laboratwari ipima ubutaka. Bizatuma habaho kubaka inzu twizeye ko zikomeye.”

Kugura ibikoresho byo muri iyi laboratwari ubundi igizwe n’ibyumba bitatu, harimo ahapimirwa ibijyanye n’ubwubatsi, ahapimirwa iby’amazi ndetse n’ahapimirwa ibijyanye n’ibinyabutabire, byatwaye miriyari y’amafaranga y’u Rwanda.

MENYA UMWANDITSI

Marie Claire Joyeuse

Umunyamakuru

@ JoyeuseC

Reba inkuru zose nanditse ( 1569 )