Umuyobozi w’Akarere ka Huye, Ange Sebutege, atanga ubu butumwa ashingiye ku biza byahagaragaye muri iyi minsi, bituruka ahanini ku mvura imaze iminsi igwa ivanze n’umuyaga, inatanga imicyo idahagije ku buryo hari inzu zifite inkuta zidakomeye zagiye zigwa.

Agira ati “Ku nzu zasenyutse hari aho inkuta zagiye zigwa, kandi iteganyagihe ritubwira ko hazagwa imvura nyinshi. Mu rwego rwo gukumira rero, inzu bazirinda ko zinjirwamo n’amazi baca imiferege iyayobora.”

Akomeza agira ati “Mu biza byabaye hanagaragayemo ibisenge by’inzu biguruka. Ni ngombwa ko abantu bareba ko ibisenge biziritse neza.”

Mu hagaragaye ibiza muri iyi minsi, harimo inzu zasenyutse ku bw’inkuta zaguye mu Mirenge ya Ruhashya, Rwaniro na Mbazi, imwe imwe, n’ibisenge byagurutse cyane cyane mu Murenge wa Mbazi, aho abahatuye bavuga ko iwabo hakunze kugaragara umuyaga mwinshi, ku buryo batazi icyo bazawukorera.

Uwitwa Marie Mukamana utuye i Rugango, nyuma y’umuyaga mwinshi wagaragaye iwabo tariki 14 Mutarama 2023 yagize ati “I Rugango ibiza bihora bihaca. Inzu yanjye isambutse inshuro eshatu. Ejobundi narasannye, n’ubu ariko yari igiye ni uko umuyaga warwanye n’ibiyiziritse. Umuyaga uhaca sinzi ikintu tuzawukorera.”

Imvura ivanze n’umuyaga imaze iminsi igwa kandi, mu Murenge wa Mbazi yahangije urutoki kuri hegitari ebyiri, naho mu Murenge wa Huye inkangu irenga ku butaka buri kuri hegitari.