Abana bo mu ishuri ry’inshuke Legacy School ni bo babimburiye abandi bantu bose gutanga amafaranga, maze bavuga ko batanze ibihumbi 50. Hakurikiyeho n’abandi bana bo mu bigo byo muri Kinazi byaba iby’amashuri abanza cyangwa ayisumbuye.

Hari n’umwana wiga mu mashuri abanza bigaragara ko aturuka mu muryango ukennye wavuze ko azatanga 500 ku giti cye mu mpera z’uku kwezi.

Hari n’abandi bagize bati “twegeranyije amafaranga 7500 yo kwihesha agaciro”, abandi bati “twe twabashije kwegeranya 7620 …”

Umubyeyi umwe ufite umwana wiga mu wa mbere w’amashuri abanza yagize ati “umuhungu wanjye namuhaye amafaranga 100 ngo aze kugura ibisuguti byo kurya, atashye ambwira ko yaguze ibya 50, mubajije icyatumye atagura iby’amafaranga nari namuhaye yose arambwira ngo nayihesheje agaciro nyaha maitresse”.

Muri rusange, amafaranga Abanyakinazi batanze uyu munsi ni miliyoni eshatu n’ibihumbi 761 n’amafaranga 780. Ayo bari batanze mu gihe cyo gutangiza iki kigega ku rwego rw’Akarere ni miliyoni enye n’ibihumbi 850. Yose hamwe rero amaze kuba miliyoni umunani, ibihumbi 611 n’amafaranga 780.

Uretse ko basabwe kuzayajyana kuri konti hanyuma bakazana bordereaux, abaturage bari bahari bose ngo baje bitwaje amafaranga bibwira ko hari bube agaseke bakayashyiramo.

Umubyeyi umwe yagize ati “buriya aba bantu bose ubona batagira uko bangana hano, nta n’umwe udafite byibura 500 yaje yitwaje, none ubu turayasubiza yo”.

Abatuye mu Murenge wa Kinazi banaboneyeho kwishimira ko babonye umwanya mwiza mu kwesa imihigo, dore ko bavuye ku mwanya wa 14 mu mwaka ubanziriza ushize bakagera kuwa 7 mu mwaka ushize w’ingengo y’imari.

Banahembye abakozi bitwaye neza kurusha abandi

Umurenge wa Kinazi wanahembye abantu bagaragaje ubudashyikirwa mu kazi kabo mu mwaka ushize w’ingengo y’imari, ari na wo bishimiraga kuba baragizemo umwanya mwiza mu kwesa imihigo, bagenewe ishimwe n’ubuyobozi bw’Umurenge.

Muri abo bahembwe harimo umukozi wo kuri uyu murenge, Madame Iyakaremye Liberata, hakabamo umwarimukazi wagiye agaragaza udushya mu kazi akora k’uburezi, Akimana Euphrasie. Harimo kandi n’umuhinzi ndetse n’umworozi b’intangarugero ari bo Yozefu na Sekimonyo.

Kubera ko bavuye ku mwanya wa 14, bakagera kuwa 7 mu kwesa imihigo, ubu uyu Murenge witeguye kuzigira imbere, byanarimba ukaba uwa mbere.

Umuyobozi w’uyu Murenge, Migabo Vital afite icyizere ko bazabigeraho kuko nyuma y’igihembwe kimwe bashyira mu bikorwa imihigo biyemeje, ubu ngo bageze ku rugero rushimishije.

Marie Claire Joyeuse