JRLOS II yatangijwe kuri uyu wa kane tariki 12/9/2013, na Perezida w’Urukiko rw’ikirenga mu Rwanda, Prof. Sam Rugege; wibukije inshingano z’Inkiko, iza Ministeri n’ibigo bishinzwe ubutabera, umutekano n’uburenganzira bwa muntu.

“Hakenewe gutanga ubutabera bwihuse, gukumira ibyaha bimunga ubukungu, gukemura impaka zishobora kudindiza iterambere, hamwe no kwihutisha imirimo hakoreshejwe ikoranabuhanga”, nk’uko Perezida w’Urukiko rw’ikirenga, Prof. Rugege yasabye JRLOS ya kabiri.

Ministiri w’ubutabera/Intumwa ya Leta, Johnston Busingye yashimangiye ko niba EDPRS ari gahunda igamije kuzamura ubukungu bw’igihugu, bidashoboka nta mutekano cyangwa mu gihe inkiko zitaburanishije imanza ngo abantu babone uko bajya mu mirimo yabo.

Minisitiri Busingye ati:“Ni kimwe n’izindi gahunda zaba iziteza imbere ubuzima cyangwa izijyanye n’ibikorwaremezo, iyo abaturage batabifite, nta musaruro igihugu gishobora kubona kuko baba batashobye kujya mu mirimo.”

JRLOS II yiyemeje gukemura ikibazo cy’ihererekanyamakuru n’amadosiye mu bucamanza, aho ngo mu myaka ibiri iri imbere hazaba hatangijwe porogaramu y’ikorabanuhanga yiswe IECMS, yakira amakuru aturutse muri buri rwego rw’igihugu, ikayabika ndetse ikanayakwirakwiza ku rwego ruyakeneye urwo ari rwose.

Uretse gufasha abaturage n’inkiko gutanga no kwakira ibirego hatabayeho ingendo no gukoresha impapuro, IECMS ngo izanafasha abantu bafite amadosiye mu butabera kumenya imiterere yayo no kuyakurikirana mu buryo butabahenda, nk’uko Ministiri w’ubutabera yongeraho.

Itsinda rya JRLOS rihuriwemo n’Inkiko na za Ministeri, iy’Ubutabera, iy’Ingabo, iy’Umutekano, Polisi y’Igihugu, Ubushinjacyaha, Urwego rw’Umuvunyi, Komisiyo y’Ubumwe n’Ubwiyunge, iy’Uburenganzira bwa muntu, Inkiko n’Ubushinjacyaha bya Gisirikare, Urwego rushinjwe imfungwa n’abagororwa hamwe n’Ishuri rikuru ry’amategeko rya ILPD.

JRLOS yashyizweho n’iteka rya Ministiri w’Intebe mu mwaka wa 2010, igamije gukumira Jenoside, guteza imbere gahunda zifasha igihugu kugendera ku mategeko no gukorera mu mucyo.

Simon Kamuzinzi