Iri tsinda rizayoborwa na Brig Gen Muhezi wo muri Uganda ryashyizweho kuri uyu wa gatanu tariki 14/09/2012 mu mujyi wa Goma muri Repubulika Iharanira Demokarasi ya Kongo.

Saa kumi n’ebyiri zirenga nibwo abaminisitiri b’ingabo, abagaba b’ingabo, ubunyamabanga bwa ICGRL hamwe n’ubuyobozi bwa MONUSCO bwahuye n’itangazamakuru rya Congo n’u Rwanda baritangariza ko hashyizweho itsinda rizagenzura imipaka Congo ihana n’ibihugu biyikikije.

Iri tsinda rigizwe n’abasirikare batatu b’u Rwanda na batatu ba Congo ibindi bihugu bigize umuryango wa ICGRL bigatanga abasirikare babiri.

Minisitiri w’ingabo wa Uganda, Kiyonga, yatangaje ko ishyirwaho ry’izi ngabo ari intambwe nziza mu gukuraho urwicyekwe ku bihugu bikikije Congo.

Ikindi nuko hateganyijwe kuzashyirwaho ingabo zidafite aho zibogamiye zizakora akazi ko guhagarika imirwano ibera mu burasirazuba bwa Congo abazayirengaho bakazarwanywa.

Haba ku ruhande rwa Congo hamwe n’umuryango w’akarere k’ibiyaga bigari bavuga ko batataye igihe mu biganiro byatangiye mu kwezi kwa Nyakanga uyu mwaka bategura uburyo bashyiraho iri tsinda rizagenzura imipaka kuko bizakuraho urwicyekwe hagati y’ibihugu bikikije Congo.

Nubwo Congo igaragaza ko ishaka gucyemura ikibazo cy’imitwe iyirwanya hakoresheje ingabo mpuzamahanga, bishobora kuyigora mu gihe itumvikanye n’abayirwanya cyane ko iri tsinda ritagamije kurwana.

Ingabo zidafite aho zibogamiye nazo zikazahagarara hagati y’abarwanya aho kubarwanya, bigaragaza ko Congo isabwa gucyemura ikibazo cy’imitwe iyirwanya.
Umuvugizi w’ingabo z’u Rwanda , Brig Gen Joseph Nzabamwiza, avuga ko iki gikorwa ari kiza ku bihugu byo mu karere cyane cyane mu kwicyemurira ibibazo.

Avuga ko kuba u Rwanda ruri mu bihugu bizagenzura imipaka bizafasha akarere kwicyemurira ibibazo kurusha uko byacyemurwa n’abanyamahanga.

Iki gikorwa gishyigikiwe n’umuryango wabibumbye, umuryango w’ubumwe bwa Afurika ndetse n’imiryango ikorera mu karere ariko mu mezi atatu ya mbere y’ibikorwa by’iri tsinda ryashyizweho abasirikare bazakoresha ubushobozi bahabwa n’ibihugu baturukamo.

MUNISCO yo izakomeza gukora ubugenzuzi usanzwe ukora ndetse izafasha iri tsinda gutegura ibikorwa kugira ngo bigerweho neza. Iki ni kimwe mu bikorwa ibihugu byo mu karere byikoreye bidateze amaboko imiryango mpuzamahanga nk’uko byari bisanzwe.

Sylidio Sebuharara