Umwaka ushize u Rwanda rwatunguwe no kwakira Abanyarwanda barenga ibihumbi 10 bari baturutse muri Tanzania, aho bari birukanywe mu buryo butunguranye.

Leta yabyitwayemo neza ndetse n’abafatanyabikorwa barimo imiryango mpuzamahanga bikabasha gukemura iki kibazo mu buryo bwihuse. Gusa habaye isomo ry’uko hakwiye kubaho uburyo bwo kwitegura mu gihe ikindi kibazo nk’iki cyakongera kuba.

Kuri uyu wa Gatatu tariki 26/2/2014, MDIMAR yahuye n’andi mashami y’Umuryango w’Abibumbye yita ku bibazo by’impunzi, mu rwego rwo gushyiraho uburyo buzashobora guhangana n’ibibazo nk’ibi ndetse n’ibiza byatungurana.

Minisitiri Seraphine Mukantabana yatangaje ko nyuma y’inama hamwe n’abafatanyabikorwa bazashyiraho ikigega gishobora kuzifashishwa hagize ikiza kiba, kandi bishyirwe mu nyandiko.

Yagize ati "Ubu turasa n’abantu bavuga bati dufite ikigaga hariya dushobra gukoramo hagize igitera. Ni ukuvuga ngo ibitekerezo byose biragenda bijye hamwe bibe bibitse ahantu ku buryo twitegura buri kantu kose tukavuga tuti nihaba haje abana bangana gutya, nihaza abantu batwite, nihaza abasaza ibyo byose kandi biteganyijwe n’ibyo kubafasha biteganyijwe atari ukubanza gushwiragira buri wese yataye umutwe."

Lamin Momodou Manneh, uhagarariye ishami ry’umuryango w’Abibumbye (ONE UN) yatangaje ko n’ubwo u Rwanda rwakemuye ikibazo mu buryo bwihuse ubwo Abanyarwanda batahukaga ariko hakwiye kubaho uburyo bwihariye.

Ibi abihera kuba imiterere y’u Rwanda yonyine ituma haba ibiza bitandukanya biturutse ku mihindagurikire y’ikirere, ndetse n’abantu bakaba bashobora guhungira mu Rwanda cyangwa bakaruvamo bagenda.

Emmanuel N. Hitimana