Aba bagabo ngo binjiye mu mutwe Maïmaï ya Kutumba na Nyatura ku ngufu kuko amashyamba bahungiyemo ahitwa Kabuye I na II hari amoko abiri ashyamiranye, bituma abakuriye ayo moko y’Abarega n’Abatembo babashyira mu gisirikare cy’imitwe yabo ku ngufu.

Nk’uko kandi babisobanuye, ngo bari babayeho nabi, batunzwe n’ubugizi bwa nabi, nko kwambura abaturage ibyabo, ubwicanyi, n’ubundi bugizi bwa nabi.

Gusa banatangaje ko bari bakomeje guhangayikishwa n’ingaruka z’intambara bahoragamo, dore ko n’imiryango yabo yose yaguye muri izo ntambara bakaba batahutse imbokoboko.

Aba bagabo bombi bavuga ko basanze u Rwanda rwarateye imbere cyane, ndetse ngo uko bakiriwe n’uko bafashwe byatumye bemeza amakuru bahoraga bumva ku maradio ko abatashye bakirwa neza kandi ko mu Rwanda ari amahoro.

Bashishikariza abagisigaye mu mashyamba ya Congo gukomeza gutahuka kuko mu Rwanda ari amahoro, aho gukomeza kubaho nabi kandi igihugu cyabo gitekanye.

Kayijuka na Gatabazi bahise bajyanwa mu nkambi ya Nyagatare iri mu karere ka Rusizi ishinzwe kwakira byagateganyo abatahutse mbere y’uko boherezwa mu miryango yabo.

Abatahutse bari mu mitwe ya gisirikare babanza kunyura mu ngando bigishirizwamo aho u Rwanda rugeze rwiyubaka n’icyerekezo cy’iterambere rufite.

Euphrem Musabwa