Iyi gahunda ije yunganira iyo Leta yateganyaga gutangiza mu bihe bya vuba ya “Televiziyo kuri buri muryango” yatangijwe na Minisitiri Jean Philbert Nsengimana ushinzwe Ikoranabuhanga n’Urubyiruko, Umuyobozi w’Umujyi wa Kigali Fideli Ndayisaba n’umuyobozi wa TIGO.

Yagize ati: “Ikoranabuhanga riri ku isonga. Tukaba tugira ngo ibikorwa byagezweho uyu munsi byiyongere, bibe byinshi abantu babikoremo ubucuruzi, ariko hagamijwe ko abaturage babona amakuru bakamenya aho amahirwe ari, tukarenga cya cyiciro cyo kuvuga ngo akanyoni katagurutse ntikamenya iyo bweze, kuko iyo bweze ni ahangaha iwacu. Amahirwe yose ashobora kuboneka mu nzego z’abaturage yegerejwe abaturage ba Nyarurama.”

Abatuye aka gace, cyane cyane urubyiruko ruturiye aka gace, bishimiye iterambere ryabegerejwe bakavuga ko bagiye kuva mu bwigunge, abandi bagashobora gukora ubushakashatsi ku mirimo yabateza imbere.

Umuyobozi w’Umujyi wa Kigali Fideli Ndayisaba yarangaje ko iyo ari gahunda itazahagarara kugeza buri mudugudu utifashije w’umujyi wa Kigali uhawe ubufasha mu itangarizwamakuru, kuko abaturage bafite uburengazira bwo kumenya amakuru ku gihugu cyabo.

Muri iki gikorwa gikozwe mu kwezi kwahariwe imiyoborere myiza, hateganyijwe no gutanga mudasobwa ebyiri muri buri mudugudu na interineti y’ubuntu yazo na televiziyo ifite amasheni anyuranye yo hanze. Imidugudu 50 y’icyaro igize umujyi wa Kigali niyo igenewe ibi bikoresho bizakomeza gukurikiranwa na Soyiyete y’itumanaho ya TIGO ari nayo yabitanze.

Emmanuel N. Hitimana