Haruna Nshimiyimana, Umuyobozi w’Ishami rishinzwe Imitunganyirize y’Imijyi n’Imyubakire, atangaza ko ari ubwa mbere mu Rwanda hashyizweho amabwiriza y’imiturire (Rwanda Building code).

Ngo arasobanurirwa abayobozi n’abakozi bafite aho bahurira n’imiturire kugira ngo bagire gahunda mu miturire ijyanye n’iterambere rirambye.

Aya mabwiriza aje mu gihe imwe mu mijyi imaze igihe kirekire ibayeho hagiye hagaragara akajagari; ariko Haruna avuga ko azagira icyo ahindura mu mijyi mishya iri kuvuka.

Ati “Ikintu numva kizahinduka nka hano mu Karere ka Kamonyi, ni uko gashobora kugira igenamigambi, ho hakabaho gutegura ukuntu hazaturwa n’ukuntu imijyi izaturwa kuko ari akarere gatangiye guturwa muri ino minsi”.

Tariki 29 Nzeri 2015, abayobozi, abakozi ndetse na bamwe mu bagize sosiyete sivile basobanuriwe amategeko, amateka n’amabwiriza agenga imiturire kugira ngo bagire uruhare mu kumenyesha abaturage politiki y’imiturire kandi babasabe kubigiramo uruhare.

Ibikenewe mu igenamigambi ry’imiturire ni uko hakorwa ibishushanyo mbonera by’imijyi n’imidugudu. Aha hakunze kugaragara ikibazo cy’abaturage batabona ubushobozi bwo kubaka ibiteganywa aho batuye, maze bakubaka bahanganye n’ubuyobozi.

Umuyobozi w’Akarere ka Kamonyi Wungirije ushinzwe Ubukungu n’Iterambere, Uwineza Claudine, ashima kuba urwego rw’igihugu rwashyizeho politike rusange y’imiturire kuko bizatuma uturere twose tugendera kuri gahunda imwe.

Aragira ati “Ni ukureba ngo ni gute mu gihugu haba inzira imwe yo guturwa kandi uturere tugakurikiza ubushobozi bwatwo kandi mu mabwiriza agendeye hamwe.”

Mu mabwiriza y’imyubakire, kubakisha amatafari ya Rukarakara ku mazu atagerekeranye biremewe, kuko ari igikoresho abaturage bashobora kwibonera hafi yabo kandi gishobora kuramba cyabumbwe neza.

Cyakora, ngo ibikoresho byo kubaka bizajya bigenwa hakurikijwe ibyo igishushanyo mbonera cy’ahantu runaka giteganya. RHA itangaza ko gushyiraho politiki y’imiturire bigamije korohereza buri munyarwanda kubona aho atura.

Marie Josee Uwiringira