KT TV
Guverinoma nshya: MINALOC, Minisiteri y’ibidukikije zihawe Abaminisitiri bashya
Minisiteri y’Ibidukikije yahawe Minisitiri mushya, Dr. Bernadette Arakwiye, akaba asimbuye Dr. Uwamariya Valentine, mu gihe Minisiteri y’Ubutegetsi bw’Igihugu yahawe Dominique Habimana muri Guverinoma nshya yashyizweho kuri uyu mugoroba.
Dominique Habimana asimbuye Dr Patrice Mugenzi wari muri MINALOC kuva tariki 18 Ukwakira 2024. Ku itariki ya 06 Kamena 2024 nibwo Dominique Habimana yari yaragizwe Umunyamabanga Mukuru wa RALGA, Ishyirahamwe rihuza Inzego z’ibanze n’Umujyi wa Kigali.
Ishyirwaho rya Guverinoma nshya rikurikiye impinduka zabaye eho, aho Perediza wa Repuburika yahinduye Minisitiri w’intebe Edouard Ngirente, akamusimbuza Justin Nsengiyumva.
Iyi Guverinoma irimo Minisiteri makumyabiri n’imwe, wongeyeho umuyobozi wa RDB n’uwa RGB bashyizwe ku rwego rw’Abaminisitiri. Harimo kandi n’abanyamabanga ba Leta icumi wongeyeho umuyobozi wa RDB wungirije washyizwe k
u rwego rw’Umunyamabanga wa Leta.
Ku banyamabanga ba Leta, naho hagiye haba impinduka, aho nko muri Minisiteri y’ubuhinzi n’Ubworozi, Dr. Ndabamenye Telesphore yakuwe mu kigo gishinzwe iterambere ry’ubuhinzi n’ubworozi yayoboraga, akagirwa umunyamabanga wa Leta.
Muri Minisiteri y’ibikorwa remezo Dr. Jean de Dieu Uwihanganye yagaruwe nk’umunyamabanga wa Leta ushinzwe ibikorwa remezo, nyuma yo gusoza inshingano muri Singapure aho yari Ambasaderi.
N’ubundi Uwihanganye agarutse muri uyu mwanya kuko ari wo yari yagiye aturukamo.
Mu bandi bayobozi bashya, Nick Barigye yagizwe Guverineri Wungirije wa Bank nkuru y’u Rwanda (BNR), asimbuye Dr. Justin Nsengiyumva wagizwe Minisitiri w’Intebe. Barigye yari aherutse kugirwa Umuyobozi Mukuru wa Crystal Ventures (CVL) Ltd.
Ikindi kandi, Ikigo gishinzwe Mine Peteroli na Gaz, n’Ikigo gishinzwe guteza imbere Ubukerarugendo bushingiye ku Nama (RCB), bizarebererwa n’urwego rushinzwe Iterambere mu Rwanda (RDB) hashingiwe ku ivugururwa riri gukorwa muri izi nzego.
Ibitekerezo
Ohereza igitekerezo
|
|
