Yabitangaje ubwo yatangizaga iyi gahunda mu kigo cy’ubushakashatsi mu by’ubuhanga n’ikoranabuhanga (IRST), kuri uyu wa Gatanu tariki 14/3/2014.

Asobanura iki gitekerezo, Guverineri Munyantwari yavuze ko kumvisha umutima ari ukumva akababaro ka mugenzi wawe, ukumva akababaro waba warateye mu bikorwa cyangwa mu burangare, ukumva ko nawe watanga imbabazi igihe mugenzi wawe azikwatse.

Yagize ati “Kumvisha umutima ni ukumva ko n’ubwo waba ufite akababaro gakomeye cyane utakagereranya n’ak’undi ngo wumve ko ntacyo kavuze, ukumva ko buri wese mu bibazo yagize, mu bikomere yagize, na byo ari ibikomere kandi ukwiye kubyumva.”

Muri uko kumvisha umutima, "Ndi Umunyarwanda" izatuma buri Munyarwanda agira agaciro, nk’uko yakomeje abisobanura.

Ati “Bavandimwe, ugomba kumva ko ufite agaciro, ukakagendera ariko utagakandagiza abandi, bigatuma wumva ko na mugenzi wawe agafite. Ntugateshe mugenzi wawe agaciro, kuko iyo ukamutesheje nawe uba wagataye.”

Ku bw’ibyo rero, uyu muyobozi agira inama abatuye mu Ntara ayobora kwitabira ibiganiro bya "Ndi Umunyarwanda" nk’inzira yo kugera ku bumwe n’ubwiyunge bwuzuye, kuko intambwe yamaze guterwa mu bumwe n’ubwiyunge idahagije igihe hari abantu bakishishanya.

Abanyapolitiki bayirwanya na bo yabageneye ubutumwa. Ati “niba hari n’abashaka gukora politiki bakora politiki nzima, bakagaragaza gahunda zabo, bakaza bagapiganwa n’abandi, ariko ibintu byo kwigisha amacakubiri cyangwa byo guhakana ibyiza bya gahunda ya "Ndi Umunyarwanda," ntabwo bishobora gufasha umunyapolitiki uwo ari we wese.”

Marie Claire Joyeuse