KT TV
GMO yagiranye amasezerano na RALGA yo kwihutisha ihame ry’uburinganire
Urwego rw’Igihugu rugenzura uburinganire (GMO) rugaragaza ko hari ibyiciro bigenga ubuzima bw’igihugu bitaraha amahirwe angana ibitsina byombi; rukaba rwatangiye kugirana amasezerano n’inzego zitandukanye, ruhereye ku ishyirahamwe ry’uturere n’umujyi wa Kigali (RALGA).
GMO yagiranye amasezerano y’imikoranire na RALGA kuri uyu wa mbere tariki 24/2/2014, aho RAGA yemeye gukorera ubuvugizi inzego z’abagore n’abakobwa bataragira amahirwe angana nk’ay’abagabo n’abahungu, mu byiciro bimwe na bimwe bigenga ubuzima bw’igihugu.
“Hari ibigaragaza ko igihugu gifite umuvuduko mu kubahiriza uburinganire, aho natanga urugero mu nzego zifata ibyemezo; na mwe murabizi mu Nteko ishinga amategeko no muri za Njyanama”, nk’uko Umuyobozi wa GMO, Mme Rose Rwabuhihi, yabitangaje.
“Ariko hari ibyiciro bigikeneye imbaraga nyinshi, mfashe urugero mu bukungu, nk’ibigo by’ubucuruzi wakwibaza uti ‘benebyo ni bande! Mu ikoranabuhanga naho abagore n’abakobwa ni bake; bivuze ko hagati yo gushyiraho amategeko no kuyubahiriza, hakiri urugendo runini cyane”, nk’uko Umuyobozi wa GMO yakomeje asobanura.
RALGA ihamya ko ubufatanye bw’inzego (bitari ugufatanya na GMO gusa), buzafasha kubungabunga amikoro buri rwego rukoresha, rutarinze kuvunika kandi ngo hari abafite ibyo rwifuza cyangwa babishoboye kandi banabifite mu nshingano.
Amaze gusinya ku masezerano y’ubufatanye, Umunyamabanga mukuru wa RALGA, Theogene Karake yashimangiye ko hari amahirwe abagore batarahabwa, aho agira ati:“Abagore baracyakorera mu buryo bubagoye cyane; wabasaba ute raporo badashoboye kuzitanga! Hamwe nta mihanda bafite, ingaruka bagira mu ngo akenshi zituruka ku murimo bakora”.
Ati: “Twe rero tuzakora ubuvugizi, kandi niduteganya akazi mu nzego z’ibanze, tuzajya tunatekereza ku iyubahirizwa ry’uburinganire; turateganya gushyiraho ishuri (ridasanzwe) ryo kwigiramo no kuganiriramo ibijyanye n’uburinganire, ku buryo umuntu ashobora no kuhakura impamyabushobozi mu bijyanye n’uburinganire mu nzego z’ibanze”.
Karake yemeza ko RALGA inateganya guteza imbere umugore muri gahunda yo kuzamura ubukungu mu nzego z’ibanze, yitwa Local Economic Development (LED), hamwe no guhugura abagore kwitinyuka kugirango muri manda itaha y’ubuyobozi bw’inzego z’ibanze, abagore baziyamamaze ari benshi.
Ku bikunze kuvugwa ko hari aho mu kazi cyangwa mu mashuri habaho gushaka umubare runaka w’abagore cyangwa abakobwa hatitawe ku bushobozi bafite, Umuyobozi wa GMO yabihakanye avuga ko ibyo bidafite ishingiro. Ati: “Ayo ni amagambo atagira gihamya; biramutse hari aho byabaye ko umuntu ahabwa amanota adakwiye, byaba ari ikosa”.
GMO ivuga ko izakomeza kugirana amasezerano n’ibindi bigo, kugirango ihame ry’uburinganire ryishyirwe mu ngiro mu nzego zose z’igihugu.
Simon Kamuzinzi
Ibitekerezo ( 3 )
Ohereza igitekerezo
|
|
uburinganire nibimwe mu ishingiro ry’iteramber ry’iki gihugu kandi rigomba gushyigikirwa aho ariho hose, kuba hari ahantu hasigaye hataragera uburinganira byagakwiye kwihutisha , abagore uko bari n’imitima y’ingo tujye twibuka ko ari n’imitima y’igihugu.
uburinhganire bugoma gushimangirwa kandi bukagerakuri bose haba nop mu byaro kuko usanga bikorwa mu migi gusa . ibi bizatuma buri wese yiyumva mu iterambere ry’igihugu kandi vuba kubera ubufatanye
ko nziko mu nzego zose zigihugu habaho uburinganire aho hasigaye ni hehe? gusa byo uburinganire budufitiye akamaro kanini mu iterambere ry’igihugu cyacu niba hari abasiagaye inyuma mubahwiture nabo babateze imbere.