Iyo ndwara Kankindi wacitse ku icumu rya Jenoside yakorewe Abatutsi muri Mata 1994, arwaye yayitewe n’ibirozi yohererezwa n’umugabo witwa Nzabamwita Alex yishyuje imitungo yatwaye mu muryango we muri Jenoside kandi nawe arabyiyemerera.

Kankindi Béatrice urwariye ku kigo Nderabuzima cya Gishubi aratangaza ko amaze umwaka wose arwaye amagini yohererezwa na Nzabamwita Alex utuye mu murenge wa Gishubi, mu Kagari ka Nyakibungo.

Byatangiye ubwo Kankindi yishyuzaga Nzabamwita inka enye yari yasigiwe na musaza we muri Jenoside kuko bari incuti magara. Nzabamwita yemeye kuzishyura ariko amubwira amukanga ko nta faranga na rimwe azarya mu yo azishyura.

Kankindi yagize ngo ibyo Nzabamwita amubwiye ni ukumukanga ariko ibyo yamubwiye byabaye impamo ubwo uyu mugore yameraga nk’ufite ubumuga bwo mu mutwe agatwika amafaranga ibihumbi 250 yari yamwishyuye muri Nyakanga umwaka wa 2011. Kuva ubwo iyo bigeze mu ijoro arasohoka akarara ku gasozi mu gitondo akisanga asharambuye umubiri wose aho aba yambaye hose.

Nzabamwita Alex yemeza ko ibyo bavuga ko ariwe ubimuterereza ari ukuri. Avuga ko musaza wa Kankindi yamusigiye inka muri Jenoside bigeza ubwo yazihunganye i Burundi arazihungukana ziza gutwarwa n’umugabo wacitse ku icumu witwa Habyarimana Célestin aherekejwe n’abasirikare ku ngufu ariko bamusigira inyandiko y’uko bazitwaye.

Ubwo Kankindi yahungukaga akamwaka inka za musaza we, Nzabamwita yareze Habyarimana kuko ariwe wari warazitwaye ariko bageze mu rukiko Nzabamwita aratsindwa bituma mu gihe cy’inkiko Gacaca ategekwa kuzishyura amafaranga ibihumbi 400.

Ibyo ngo nibyo byamuteye umujinya n’umutima w’ubugome, maze abifashijwemo na Bikindi Eliazar utuye i Sasa muri komini Bugabira mu Burundi ajya gucisha ibirozi ku witwa Karenzo nawe wo muri iyo komini.

Abaforomokazi bagiye bakurikirana Kankindi uko yagiye agezwa kwa mugaga batangaza ko ibiba kuri Kankindi bidasanzwe.

Umuforomo kazi witwa Giramata Florence agira ati “Ibiba kuri Kankindi ni indengakamere, umuntu ntiyabyiyumvisa kereka ubyiboneye kandi natwe ababibonye biraturenga”.

Iyo Kankindi afashwe ata ubwenge kandi aba atongana n’umuntu mu by’ukuri uba udahari. Iyo bimufashe bimwaka amafaranga ndese bikamusaba no kuyimana nawe yagira icyo ahakana bikamukubita kugeza yemeye; nk’uko uwo muforomokazi abitangaza.

Igitangaje ni uko ngo byamwatse amafaranga yari afite mu mufuka n’ayo yari yasize mu rugo yose akabura kandi nta muntu wayatwaye. Iyo ibyo birozi birimo kumukubita buri wese umwegereye arabyumva, ariko ntihagaragare umukubita.
Icyo kwa muganga bamufasha ni ukugerageza kuvura ibikomere bye gusa kuko kugeza ubu nta muti w’uburozi bagira.

Abaturanyi ba Nzabamwita warogesheje Kankindi bemeza ko uyu mugabo aroga kuko n’ubusanzwe adasabana n’abandi ntanasangire nabo. Bavuga kandi ko uyu mugabo kuva kera azwiho ubugome no kuroga. Nzabamwita Alex ubu afungiye ku biro bya polisi mu murenge wa Gishubi mu karere ka Gisagara.

Clarisse Umuhire