Nyiramfura Angélique na nyirakuru umurera ndetse n’undi muvandimwe wabo bari kuri station ya Polisi ku Gisagara, baturutse mu mudugudu wa Bishya bakavuga ko bagenzwaga no kwishinganisha basaba ko ubuyobozi bwababa hafi kuko nta mutekano bafite aho batuye ku bw’ihohoterwa bakorerwa n’abaturanyi babo.

Nyiramfura avuga ko tariki 24/03/2013 yakubiswe n’umusore baturanye ndetse akanahutaza nyirakuru w’uyu mukobwa akamuta mu byondo ubwo yajyaga kubaza icyo ahoye umwuzukuru we, anababwira amagambo agaragaramo ingengabitekerezo ya Jenoside.

Nyiramfura Angélique ati “Ubundi uwo muhungu se niwe wishe umuryango w’iwacu se aranafunze, ubwo rero twari twugamye n’abandi ku kabari duturanye, araza ansanga aho ndi ankubita urushyi, aravuga ngo ubu noneho ubwo icyunamo kigeze bugiye gutangira bujye bwihahamukisha, aranavuga ngo ubundi se papa ufunze ntazira ubusa?”.

Nyuma uyu musore yaje kujyanwa kuri station ya Polisi muri uyu murenge ariko nyuma Polisi imurekura ivuga ko muri dossier ye nta bimenyetso bihari bigaragaza ingengabitekerezo. Uyu muryango wo ukavuga ko ibyo watanze kuri polisi byose bitanditswe muri dossier ariyo mpamvu bitagaragaramo.

Umuvandimwe w’uyu mukecuru utashatse ko izina rye ritangazwa, avuga ko nawe mu mwaka ushize yandikiwe unyandiko zimutera ubwoba kandi akanavuga ko n’ubusanzwe abaturanyi babo bamwe na bamwe batabareba neza ariyo mpamvu basaba gucungirwa umutekano uko bishoboka.

Ati “Twaje kwishinganisha kuko igihe nk’iki dukunze guhura n’abadukomeretsa haba mu magambo n’ibindi, jye ndi n’umujyanama mu by’ihungabana, ubwo rero nk’iki gihe cy’ibiganiro nshobora gutaha nka nijoro ngahura n’abangirira nabi, kandi duhora tubivuga ariko nta gihinduka”.

Uhagarariye umuryango IBUKA mu karere ka Gisagara, Uwiringiyimana Emmanuel, avuga ko iki kibazo akizi cyane ko ngo atari ubwa mbere uwo muhungu aregwa guhohotera abarokotse, ndetse ko nawe yigereye Polisi ariko asanga ibiri muri dossier bitandukanye n’ubuhamya bw’abaturage bahohotewe ndetse n’ababihamya bari ku kabari ubwo Nyiramfura Angélique na nyirakuru bahohoterwaga.

Avuga ko Polisi yamubwiye ko igiye gukora indi dossier. Icyo asaba inzego z’umutekano n’ukujya zita ku batangabuhamya, hagakorwa iperereza ryimbitse kugira ngo hoye kugira urengana.

Ubuyobozi bw’akarere bwo buvuga ko butari bwamenye iki kibazo, burasaba abaturage muri iki gihe cy’icyunamo gushyira hamwe, kandi bakarushaho kwegera no gufasha abasizwe iheruheru na Jenoside.

Ibiganiro bitangwa muri iki gihe cy’icyunamo ni ibigamije kumvisha abantu ububi bwa Jenoside ndetse no kubashishikariza kuyirwanya no kuba hafi abo yasize, ariyo mpamvu abaturage bahamagarirwa kubyitabira bose.

Clarisse Umuhire