Muri uru rugendo basobanuriwe ko ibibazo by’inkongi biterwa ahanini n’uburyo insinga ziba zicomekeranye. Ibyo bikanakubitiraho ko n’inyubako nyinshi zahiye muri Kigali ari izabaga zishaje.

Dina Mukamusoni, umuyobozi w’umudugudu wa Kanserege II, yatangaje ko bize ibintu bitandukanye batari bazi. Banasobanuriwe byinshi mu bibazo bibazaga mu buzima bwabo bwa buri munsi, hharimo n’ibura ry’umuriro rya hato na hato.

Ati: “Inkongi y’umuriro imaze iminsi yibasira igihugu cyacu, ibyo byose twari dufite amatsiko yo kubimenya kugirango turebere hamwe nk’umudugudu wa Kanserege ya kabiri uburyo twafata ya mbere tukazabikumira dufatanyije n’abawutuye.”

Uyu muyobozi yakomeje avuga ko ibi byatumye bafata ingamba yo kujya kwigisha abatuye muri uwo mudugudu abereye umuyobozi, kugira ngo byibuze berebe uburyo bazajya bazigama umuriro bakoresha, kuko bamaze kumenya ingano y’umuriro u Rwanda rukoresha mu gucanira Abanyarwanda aho rukoresha MW 75 gusa.

Iyi gahunda yo gukora urugendo shuri kuri Ntaruka ije ikurikira indi bari basanzwe bafite yitwa “Gira inshuti”, aho basurana n’abaturanyi bafite ibibazo bitandukanye, nk’abarwayi, bakanatahirana amakwe y’abaturanyi batuye ahandi.

Urugomero rwa Ntaruka rutanga ingufu z’amashanyarazi igera ku 10MW, aho ifatikanye n’izindi Central nka Rugezi na Mukungwa.

Kugira ngo habeho ibura ry’umuriro akenshi biba bitewe n’uko imashini imwe iba ihagaze bigatuma n’izindi ziba zifatanye nazo zigahagarara.

No mu gihe cy’impeshyi amazi aragabanuka bityo ingufu y’amashanyarazi zikagabanuka, mu gihe cy’imvura niho usanga umuriro uba uri mwinshi cyane, nk’uko babisobanuriwe n’ubuyobozi bw’uru rugomero.

Emmanuel N. Hitimana