Kuva ku mugoroba wa tariki 09/07/2012, umuyobozi w’Akarere ka Rusizi, Nzeyimana Oscar, ari kumwe n’inzego zishinzwe umutekano zikorera muri ako karere basuye abaturage batuye akagari ka Kagara ndetse banashyiraho ingamba zo guhashya ayo makimbirane.

Ikibazo cy’amarozi mu kagari ka Kagara cyane cyane mu mudugudu wa Nyandarama cyakajije umurego tariki 02/06/2012 ubwo umukecuru witwa Mukahirwa Donatira yitabye Imana, abatuye muri uwo mu dugudu bakemeza ko azize amarozi, dore ko urupfurwe rwatunguranye.

Nyirabayazana w’iki kibazo ari nawe utungwa agatoki mu rupfu rw’uwo mukecuru ni Nyirumuringa Gratien wigeze gucyura nyakwigendera ariko ntibishoboke ; nk’uko abaturanyi babivuga.

Nubwo atari we wenyine washyizwe ku rutonde rw’abarozi bagera kuri 15 muri ako kagari, abaturage bemeza ko uwo musaza yaroze Donatira ku manywa y’ihangu apfa atarwaye kandi bari bamaze iminsi bapfa imbibi z’amasambu yabo kuko ngo batikanyijwe. Ubwo bushyamirane ngo babonaga bushobora no kuzabyara izindi nkurikizi.

Hari abandi baturage batangaje ko nyakwigendera atishwe n’amarozi ahubwo ko ngo ari igihe cye cyari kigeze, ko ayo marozi avugwa atashingirwaho ngo bitume afatwa nk’ihame kandi nta n’ibimenyetso byayo bihari.

Ubwo umuyobozi w’akarere ka Rusizi yasuraga abo baturage yabasabye guharanira icyabahuza aho guhugira mu bibatandukanya, anabasobanurira ko ayo ari amatiku agamije kubasenya. Yabasabye kuyirinda kuko atuma badakomeza gutera imbere kuko nta bufatanye bushobora kugaragara ahageze amakimbirane.

Mu rwego kandi rwo guhosha ayo makimbirane buri wese yasabwe kwegera mugenzi we bagacoca ibibazo biri hagati yabo, bakihatira kubana amahoro, urwikekwe rugashira, bagakomeza inzira y’iterambere.

Musabwa Euphrem