Hagati aho ariko ubuyobozi bw’akarere burihanganisha aba baturage kuko ikibazo cyabo kigikurikiranwa kandi kikaba kizakemuka vuba.

Ku wa 29 Gicurasi uyu mwaka, ni bwo umuyobozi w’akarere ka Nyagatare wungirije ushinzwe ubukungu yari yavuze ko amafaranga yo kwishyura aba baturage azava mu ngengo y’imari y’uyu mwaka.

Gusa baba baturage bavuga ko kuba batarishyurwa bibagiraho ingaruka harimo no kubura imbuto yo gutera muri iki gihembwe cy’ihinga.

Imyaka yaranduwe mu bikorwa byo gutunganya iyi mihanda ni amasaka, ibigori n’imyumbati, ndetse abaturage bavuze ko batunguwe n’iki gikorwa kuko bumvaga nibura hari gutegerezwa ko imyaka yabo yera igasarurwa.

Kuri telephone Bwana Muganwa Stanley, umuyobozi w’akarere ka Nyagatare ushinzwe ubukungu yatangaje ko amafaranga yo kwishyura aba baturage koko yateguwe akaba yaranasabwe igisigaye akaba ari ukunoza uburyo bwo kubishyura, ari nabwo bazasaba abishyurwa numero za konti bakayabishyura.

Icyo basabwa rero ni ukwihangana, bakaba bizezwa ko ibi bizakorwa mu minsi ya vuba, dore ko no kuba bitarashyirwa mu bikorwa ari ukugira ngo binozwe kurushaho.

Ikindi gitangazwa n’ubuyobozi bw’akarere na Nyagatare ni uko ku bufatanye bw’akarere na Rwanda Housing Authority, iyi mihanda nimara gutunganywa bizongera agaciro k’ibibanza byo muri iyi quartier bikajyana no kunoza imiturire mu mujyi wa Nyagatare.

Dan Ngabonziza