Kuramukobwa ni umubyeyi ufite abana 2, umukuru muri bo afite imyaka 7 naho umuto afite imyaka 3, aba mu kiciro cya mbere cy’ubudehe agahabwa inkunga igenerwa abatishoboye.

Uyu mubyeyi yabagaho acumbika ndetse rimwe na rimwe umurenge ukamwishyurira icumbi, kuko umugabo bashakanye batakari kumwe kubera imyitwarire y’ubusinzi.

Kuramukobwa yasazwe n’ibiyishimo byo kuba bamutekereje, bakamuha inzu ndetse n’ibyo kurya n’ibikoresho azifashisha mu buzima bwe bwa buri munsi.

Ati “Jyewe ndishimye cyane kuba barantekerejeho nk’umwe mu bantu batishoboye nkaba mbonye aho kuba, ndabashimiye cyane, kuko nta byiringiro byo kubona aho kuba nari mfite”.

Iyi nzu yayishyikirijwe tariki ya 15 Ukwakira 2022 ku munsi mpuzamahanga w’umugore wo mu cyaro, mu rwego rwo kumuremera bitewe n’imibereho mibi yari afite ituruka ku bumuga abana nabwo.

Uwamurera Olive ahagarariye Inama y’Igihugu y’Abagore mu Karere ka Gicumbi, avuga ko uyu mubyeyi asanzwe afite ubumuga bw’ingingo (amaguru), bigatuma agira imibereho igoye cyane kuko mu buzima bwe bwa buri munsi nta hantu ho kuba yagiraga n’abana be, bituma bamutekerezaho nk’umwe mu bantu bagomba kwitaho, bakamufasha kuva mu buzima bumugoye.

Umuyobozi w’Akarere ka Gicumbi, Nzabonimpa Emmanuel, avuga ko iki gikorwa ari cyiza kandi ko muri ako karere bagomba kugikomeza.

Yashimiye Inama y’Igihugu y’Abagore muri aka karere ku nzu bubakiye Kuramukobwa, ndetse anamwemerera kuzamuha abantu bamuhugura gukoresha imashini iboha imipira.

Ati “Uruhare rwacu nk’akarere natwe tuzamushakira abantu bamufasha kwiyibutsa kongera kuboha imipira, namara kubimenya atangire akohe yiteze imbere abashe no kurera abana be”.

Umunsi Mpuzamahanga w’Umugore wo mu Cyaro wari ufite insanganyamatsiko igira iti "Iterambere ry’Umugore wo mu Cyaro, Inkingi y’Ubukungu bw’Igihugu”.