Ibi biganiro byafunguwe ku mugaragaro n’umuyobozi w’Akarere wungirije ushinzwe ubukungu n’iterambere, Habarurema Isaie, bikaba byari byitabiriwe n’abahuzabikorwa ba komisiyo y’amatora ku rwego rw’intara y’iburasirazuba n’akarere ka Gatsibo, abavuga rikijyana mu Mirenge ndetse n’abayobozi ku nzego zitandukanye z’ubuyobozi mu Karere ka Gatsibo.

Habarurema Isaie yemeza ko muri aya matora y’abadepite akarere ka Gatsibo kazaza ku mwanya wa mbere mu gutora neza kuko n’ubundi abatumaga kaza ku mwanya wa mbere mu myaka yashize ntaho bagiye.

Umutwe w’abadepite ugizwe n’abadepite 80 bazatorwa mu byiciro bine, bikaba biteganyijwe ko tariki 16 Nzeli 2013 hazaba amatora rusange y’abadepite 53 mu bagize inteko ishingamategeko umutwe w’abadepite, tariki 17 Nzeli 2013 hatorwe abadepite 24 b’abagore naho tariki ya 18 Nzeli habe amatora y’abadepite b’urubyiruko.

Biteganyijwe ko Abanyarwanda baba hanze y’igihugu bibaruje bazatorere muri za amabasade z’u Rwanda mu bihugu baherereyemo nkuko bitangazwa na komisiyo y’amatora.

Muri ibi biganiro havuzwe kandi ku ruhare rwi’nzego zigira aho zihurira n’amatora mu migendekere myiza y’amatora, muri zo hagaragajwe; inzego z’ubuyobozi, inzego z’umutekano, abaturage, imitwe ya politike, itangazamakuru, indorerezi, abafatanyabikorwa n’abandi.

Ibi biganiro kandi bizakomereza ku rwego rw’imirenge kuwa 25 Gicurasi 2013 bisorezwe mu tugali tariki 27 Gicurasi 2013, nyuma hakurikireho gutanga raporo ku rwego rw’Akarere ka Gatsibo kose.

Benjamin Nyandwi