Nk’uko bivugwa na Enjeniyeri Dieudonné Shimirwa, umwe mu bayoboye imirimo y’ubwubatsi bw’iyi gare, ubundi hari hasanzwe hateganyijwe imirimo y’ibyiciro bibiri byo kuyubaka, harimo gutunganya aho imodoka zizajya zihagarara ndetse n’aho zizajya zinyura zinjira cyangwa zisohoka.

Ibi byari kujyana no kubaka inzu imwe y’ubucuruzi ndetse n’indi igenewe ubuyobozi bwa gare ifatanye n’aho abagenzi bafatira ibyo kunywa (cafétariat). Iyi mirimo yagombaga kurangirana n’ukwezi kwa Werurwe 2014, nyuma y’umwaka itangiye kuko yari yatangiye muri Werurwe 2013.

Ariko ngo bimaze kugaragara ko abifuza gukorera ubucuruzi muri gare bari benshi cyane, ugereranyije n’imyanya yari ihari, biyemeje kubanza kubaka indi nzu y’ubucuruzi iherereye ku bwinjiro bwa gare, yari igenewe mbere kuzubakwa mu cyiciro cya kabiri.

Ati “urebye n’ubungubu imyanya yo gucuririzamo iracyari mikeya kuko dufite 85 nyamara dufite amabaruwa asaba gukorera muri gare 580.”

Nyuma yo gutangira gukoresha iyi gare, biteganyijwe ko hazatangira imirimo y’icyiciro cya kabiri cyo kuhubaka inyubako zirimo indi nzu y’ubucuruzi ahagana aho imodoka zizajya zisohokera.

N’ubwo mbere byari biteganyijwe ko iyi nzu izaba ari hotel, ngo umubare munini w’abashaka gukorera muri gare watumye izagirwa iy’ubucuruzi kuri nivo ebyiri zibanza, ebyiri zindi zo hejuru zikazagirwa amacumbi.

Iyi gare nirangira neza, izaba irimo ibikenerwa n’abagenzi ndetse n’amamodoka ahinjira harimo sitasiyo ya esanse ndetse n’ahogerezwa imodoka.

Izaba irimo internet ku buryo abagenzi bifuza ikoranabuhanga rizabageraho, ndetse n’abashaka kuhakorera bizinesi ya interinet bakabibasha. Izaba irimo na za kamera zizajya zituma abaharinda umutekano babasha kumenya ibibera mu nguni zitandukanye z’iyi gare.

Ibi byose bizarangira bitwaye akayabo ka miliyari eshatu z’amafaranga y’u Rwanda.

Marie Claire Joyeuse