Mu rukerera rwo ku wa Kane tariki 28 Ukuboza 2023, ubwo byamenyekanaga ko Uwineza yagwiriwe n’urukuta rw’inzu bari batuyemo mu Kagari ka Busanane Umurenge wa Rushashi mu Karere ka Gakenke, abaturage bihutiye kumukuramo ibyamugwiriye, bamwihutana kwa muganga, bamugejejeyo mu gusuzuma basanga yamaze gushiramo umwuka.

Abari basanzwe bazi iby’imibanire y’aba bombi, bakeka ko intandaro y’uru rupfu yaba ari amakimbirane ashingiye ku bushoreke uwo mugore yajyaga ashinja umugabo we.

Umwe yagize ati "Uriya mugore yatubabaje cyane kuko yari akiri mutoya kandi abanye n’abaturanyi neza. Gusa we n’umugabo we bajyaga bapfa inshoreke, binavugwa ko yari imaze n’iminsi yubakiye uwo mugabo inzu za annexe zegeranye n’aho basanzwe baba, zikaba zendaga kuzura kuko yari yaramaze no kuzisakara".

Ati "Dukeka rero ko Umugabo yaba yaratekereje kugerageza kwikiza uwo mugore we, anoza umugambi wo kumwica, ari nabyo yakoze yarangiza agakurikizaho kumuhirikiraho uru rukuta rw’inzu agira ngo agaragaze ko rwamugwiriye, mu rwego rwo gusibanganya ibimenyetso no kuyobya uburari".

Ni amakuru yamenyekanye mu ma saa kumi z’urukerera rwo ku wa kane tariki 28 Ukuboza 2023, nyuma y’aho abaturanyi b’uyu muryango banyuraga kuri uru rugo, bagatungurwa no kubona urukuta rw’inzu rwahirimye mu gihe nta n’imvura yaherukaga kuhagwa, mu kwinjiramo ngo barebe icyabiteye bagasanga rwagwiriye umugore, bakihutira gutabaza abandi baturage.

Iby’amakimbirane ashingiye ku bushoreke binagarukwaho na Sedo w’Akagari ka Busanane, Mukasine Genereuse, uvuga ko hari hashize amezi atandatu umugore agejeje mu buyobozi bw’Akagari ikibazo cy’ubushoreke yakekaga ku mugabo we, ndetse ngo icyo gihe bwanabatumyeho bombi baraganirizwa.

Ati "Umugore yajyaga acyekera Umugabo we ingeso y’ubushoreke bigateza amakimbirane hagati yabo yombi. Icyakora sinajyaho ngo nemeze koko ko uwo mugabo yagiraga inshoreke kuko nta wigeze abimufatiramo, ariko umugore we yabumushinjaga".

Ati "Byongeye kandi hari hashize nk’amezi atandatu aje kurega umugabo we mu buyobozi, yewe icyo gihe twabatumyeho mu kubaganiriza umugabo abihakana yivuye inyuma, biba ngombwa ko dusaba umudamu ko yakomeza gushakisha amakuru n’ibimenyetso bifatika twese dufatanyije; kugeza ubu nta yandi arenzeho twari twakabonye".

Uwo mugabo akaba yahise afatwa atabwa muri yombi hanatangizwa iperereza rigamije gusesengura icyihishe inyuma y’urupfu rw’uwo mugore.

MENYA UMWANDITSI

Ishimwe Rugira Gisele

Umunyamakuru

Reba inkuru zose nanditse ( 1116 )