Umuyobozi wa EU ushinzwe Afrika yo munsi y’ubutayu bwa Sahara n’ibibazo bigendanye n’umuryano wa ACP, Francesca Mosca, yaje mu Rwanda aganira na Ministiri w’imari n’igenamigambi, John Rwangombwa, ku ikoreshwa ry’inkunga ingana na miliyoni 47 z’ama-Euro, EU iherutse gutanga mu cyumweru gishize.

Aya mafaranga azafasha mu bikorwa byo kubaka imihanda no kongera umusaruro ukomoka ku buhinzi n’ubworozi; nk’uko Ministiri Rwangombwa yasobanuye.

Ikindi cyazinduye Francesca mu Rwanda, cyari ibiganiro na Guverinoma kuri gahunda y’iterambere ya 11, izatangira mu mwaka wa 2014, igendanye no kuzamura ubuhinzi no kongera amashanyarazi mu gihugu.

“Umuryango w’ubumwe bw’i Burayi ntiwigeze uhagarika inkunga ugenera u Rwanda kuko dufitanye amasezerano. N’ikimenyimenyi mwumvise ko mu cyumweru gishize twatanze miliyoni 47 zo gukomeza gufasha mu iterambere ry’iki gihugu”; nk’uko Francesca, ubwe yabibwiye itangazamakuru.

Francesca yavuze ko icyakora hari amafaranga arenga miliyoni 30 z’ama-euro, uyu muryango wa EU utarafataho icyemezo cyo guhereza u Rwanda mbere y’uko uyu mwaka urangira.

Umuyobozi wa EU muri Afurika yashimye uburyo u Rwanda rukoresha neza inkunga rugenerwa, nyuma yo gusura imihanda yubatswe mu bice bitandukanye by’igihugu, no kumva raporo zivuga ko umusaruro w’ibiribwa ugenda urushaho kwiyongera.

Ku ruhande rwa Ministiri Rwangombwa wamwakiriye, ngo nta mpungenge afite z’uko abaterankunga b’u Rwanda bazayihagarika, bitewe n’uko ibibazo u Rwanda rufitanye na Kongo Kinshasa (ruregwa gutera inkunga umutwe wa M23 uyirwanya), ari ibibazo bya politiki.

Mu kwezi gutaha k’ugushyingo, nibwo umuryango w’Abibumbye uzatangaza uburyo wasanze ibirego bivuga ko u Rwanda rufasha umutwe wa M23 byifashe. U Rwanda rukaba rwaratanze ibisobanuro John Rwangombwa yemeza ko bizahabwa agaciro.

Simon Kamuzinzi