Musenyeri Antoine Kambanda umushumba wa Diyosezi ya Kibungo yashimiye abaturage b’i Musaza ubwitange bagize baharanira kuzuza ibisabwa ngo bahabwe Paruwasi.

Musenyeri Antoine Kambanda niyo Paruwasi ya mbere atashye mu myaka itatu ahawe inkoni y’ubushumba

Yagize ati “Kuba Paruwasi ishinzwe muri aka gace ni umugisha ukomeye,Imana yatashye i Musaza. Niyo Paruwasi ya mbere ntashye mu myaka itatu mpawe inkoni y’ubushumba. Ni urugendo rurerure abakirisitu bakoze, kubona Paruwasi byose babikesha ishyaka ryo kurangwa n’ubukirisitu nyabwo bagaragaje buzuza ibyangombwa bisabwa ngo Paruwasi yemerwe”.

Bamwe mu bakirisitu baganiriye na Kigalitoday basanga kubona Paruwasi bigiye kubafasha mu bukirisitu bwa bo.

Abaturage bari bafite akanyamuneza kuko babonye paruwasi nshya igiye kubagabanyiriza ingendo ndende bakoraga bajya guhabwa amasakaramentu

Mwerimana Drocelle ati “Ntawabivuga uretse gusimbuka tukabyina, tubonye Paruwase koko? Sinari nzi Padiri. Nahabwaga Penetensiya rimwe mu mwaka n’abana banjye byajyaga bibavuna gukora urugendo bajya gusenga, ari ubu turakize”.

Manirafasha Christine ati “Ibyishimo byandenze, nigeze kujya kwigira umwana batisimu ngeze mu gishanga nkata ku iteme ngwamo ndavunika none Paruwasi turayibonye, ari ibishoboka nijye wagombaga gushyiraho ibuye bya mbere”.

Padiri mukuru wa Paruwase nshya ya Musaza, yahawe ibyangombwa azifashisha mu kwamamaza uburumwa

Mugiraneza Emmanuel wahawe inshingano zo kuba Padiri mukuru w’iyo Paruwasi yashimiye abakirizitu ubwitange bagize mu bikorwa byo gutunganya Paruwasi, abasaba gukomeza kugira ishyaka ryo guteza imbere Paruwasi ya bo.

Umuyobozi w’akarere ka Kirehe, Muzungu Gerald, yashimiye abaturage ba Musaza na Kiriziya Gatorika ati “Ahageze Paruwasi haba hageze iterambere, nta businzi, urugomo n’izindi ngeso mbi tuzongera kumva,…guhabwa Paruwasi ntibintunguye kuko aba baturage ni indashyikirwa no muri gahunda za Leta”.

Ibirori byo gutaha iyi paruwasi byabimburiwe n’igitambo cya misa cyabanjirijwe n’umutambagiro w’abapadiri

Yasezeranyije ubuyobozi bwa Paruwasi ubufatanye bw’akarere kugira ngo abaturage babashe kubona ubuzima bwa roho n’ubw’umubiri.

Paruwasi nshya ya Musaza yaragijwe Mutagatifu Yohani Pahuro wa Kabiri, yahawe abapadiri babiri ikaba yungutse n’abakirisitu 8 bahawe isakaramentu rya Batisimu.

Ikikijwe na Paruwasi ya Bare, Rusumo na Kirehe aho ikora ku bihugu bibiri Burundi na Tanzaniya.

Servilien Mutuyimana