Minisitiri wa Congo Richard Muyej yongeye kubisubiramo taliki 25/4/2013 avuga ko abantu benshi bavuze ko Leta ya Congo yanze gusinya amasezerano yo guca ubuhunzi ku Banyarwanda ariko ngo icyo igaragaza ni ugushidikanya ku mibare y’Abanyarwanda bahungiye muri iki gihugu mbere ya 30/12/1998.

Imibare ya HCR ivuga ko muri Congo hari impunzi z’Abanyarwanda mu gihe Leta ya Congo yo ivuga ko bagera ku 127 537.

Julien Paluku, Guverineri wa Kivu y’Amajyaruguru avuga ko nubwo uyu mubare uvugwa ushobora no kurenga, cyane ko izi mpunzi zivugwa zidafite ahantu ziba hazwi uretse gutura mu mashyamba n’ahandi zagiye zinjira mu baturage zigatura kandi inyinshi zituye muri Kivu y’amajyaruguru na Kivu y’amajyepfo.

Richard Muyej avuga ko mbere yo guca ubuhunzi ku Banyarwanda bahungiye muri Congo hakwiye ubufatanye bw’u Rwanda na Congo Kinshasa hamwe na HCR kugira ngo basubukure amasezerano yabereye Goma taliki 17/2/2010 ku birebana n’impunzi z’Abanyarwanda bahungiye muri iki gihugu.

Leta ya Congo ivuga ko mu 1994 yasabwe n’imiryango mpuzamahanga kwakira impunzi z’Abanyarwanda, inyinshi ngo zagiye mu duce tutazwi ziratura ndetse zafashe n’ibyangombwa by’abanyagihugu kuburyo bigoye kumenya niba ari Abanyecongo cyangwa Abanyarwanda. Congo itinya ko hakurikijwe imibare itangangwa na HCR hari Abanyarwanda bashobora kubona ubwenegihugu bwa Congo bitari bikwiye

Leta ya Congo ikaba isaba iyo miryango kuyifasha kongera kubarura no kugenzura abanyarwanda bahahungiye kugira ngo nihafatwa n’icyemezo cyo guca ubuhunzi kizabe mu mucyo.

U Rwanda rwifuza ko Abanyarwanda bari hanze y’igihugu bitwa impunzi batakomeza kwitwa impunzi kuko ibyo bahunze bitakiriho ndetse byinshi mu bihugu bahungiyemo byemeye ko uyu mwanzuro wakubahirizwa.

U Rwanda narwo rufite umubare utari muto w’impunzi z’Abanyecongo bavuga Ikinyarwanda bahungiye mu Rwanda kuva 1996, nubwo bamwe mu bayobozi ba Congo babita Abanyarwanda.

Sylidio Sebuharara