Umuyobozi wa FPR-Inkotanyi mu murenge wa Byimana, Kagimbura Thacian, yavuze ko aba banyamuryango bashimiwe hari ibikorwa byinshi bagiye bitangamo cyane cyane mu bihe by’amatora ndetse no mu bukangurambaga bushishikariza abanyamuryango kwiteza imbere.

Yagize ati “aba ndetse n’abandi tutavuze, bagiye bakora ibikorwa bitandukanye, birimo gutanga imodoka zitwara abantu mu bikorwa bitandukanye, bagatanga neza imisanzu bakanakangurira abandi kuyitanga”.

Uyu muyobozi yemeza ko aba bashimiwe bagize uruhare rugaragara mu guteza imbere abanyamuryango ndetse n’igihugu muri rusange.

Habimana Turikumwe Jean Nepo na Simpigabugabo Faustin, bamwe mu bashimiwe mu ruhame, bavuga ko ubwitange bwabo ahanini babuterwa n’uko bazi neza aho umuryango wa FPR-Inkotanyi wakuye abanyarwanda ukaba ufite n’aho ubagejeje, ibi bigatuma batazatezuka ku mugambi bihaye.

Depite Nyirabagenzi Agnès wari umushyitsi mukuru muri uyu muhango, yagaragaje ko iki ari igikorwa cyiza cyo gushimira uwakoze neza kuko biha n’abandi imbaraga zo gukora neza kugira ngo nabo bazagaragare nk’uko bagenzi babo byabagendekeye.

Iyi kongere yanarebeye hamwe ibyagezweho mu mwaka ushize ndetse inigira hamwe ibizakorwa mu mwaka utaha bigamije guteza imbere abanyamuryango. Ikindi abanyamuryango basabwe, ni ugukomeza kwima amatwi abashaka gusubiza u Rwanda inyuma bapfobya jenoside yakorewe abatutsi mu 1994.

Uretse uyu murenge wa Byimana, mu murenge wa Bweramana na Ruhango naho abanyamuryango ba FPR-Inkotanyi bateranye maze bafatira hamwe ingamba zo guteza imbere abanyamuryango ndetse n’igihugu muri rusange.

Eric Muvara