Inka zabagiwe mu midugudu abaturage bavuga ko bakwiye kwishimira ibyiza bagezeho ariko bakazirikana no gushimira Imana n’ubuyobozi bwababaye hafi batirengagije ingabo z’igihugu bababaye hafi mu bibazo bahuye nabyo.

Nkuko umunyamabanga nshingwabikorwa w’umurenge wa Bugeshi Mvano Etienne yabitangarije Kigali today ngo umwaka wa 2013 wabasigiye amateka akomeye harimo ibisasu 22 barashweho n’ingabo za Congo bikabangiriza ndetse bigakomeretsa abaturage.

Umuyobozi w’umurenge wa Bugeshi avuga ko uretse ibyo bisasu, uyu murenge wabangamiwe n’umutekano mucye wabereye muri Congo bigatuma uyu murenge warakiriye impunzi zirenga ibihumbi 3 ndetse na bamwe mu baturage bakava mu byabo kubera kuraswaho amasasu.

Mvano ariko avuga ko ibi bibazo bitabujije abaturage gukora no kwiteza imbere kuko hari byinshi bagezeho bagomba kwishimira birimo kuba barashoboye kuba aba mbere mu karere ka Rubavu mu gutanga umusasu w’ubwisungane mu kwivuza, kuba ariwo murenge warangije mbere umuhigo wo kwiyubakira inzu ya Sacco yuzuye itwaye miliyoni 25.

Umurenge wa Bugeshi kandi usanzwe uziho kweza ibirayi, gahunda y’ubudehe ngo yagenze neza kuko abaturage bagera 100 bahawe inka muri gahunda ya Girinka, uyu murenge ushobora no gutunganya centre y’ubucuruzi ya Kabumba iza ku mwanya wa gatutu mu bwiza nyuma ya Gisenyi na Mahoko.

Umunyamabanga nshingwabikorwa w’umurenge wa Bugeshi avuga ko nubwo hari byinshi bagezeho ngo baracyafite inzira yo gutera imbere irimo gutunganya imiturire no kugeza amashanyarazi ku baturage dore ko ariwo murenge utagira amashanyarazi mu karere ka Rubavu.

Abaturage bishimira ibyo bagezeho bashimiye bamwe mu baturage bamenyekanisha umurenge, Harelimana Juvenal niwe wahembwe kubera gutanga ibitekerezo kuri radiyo, abandi baturage nabo bavuga ko bakwiye kuzajya bakora ibiteza imbere umurenge ariko bakagira uruhare mu kubimenyekanisha, aho bavuga ko bacyeneye kumenyekanisha ubuhinzi bw’ibirayi bakabona isoko.

Sylidio Sebuharara