Bagaragarijwe ko kutarangiza imanza by’umwihariko izirebana n’imitungo yangijwe muri Jenoside yakorewe Abatutsi mu Rwanda biterwa n’uko bamwe mu Barundi bayigizemo uruhare bisubiriye iwabo.

Icyakora mu gukemura icyo kibazo cyo kurangiza imanza ku mitungo hashyizweho itsinda rifasha ubuyobozi bw’inzego z’ibanze; nk’uko umuyobozi w’akarere ka Bugesera Rwagaju Louis, yabigaragarije abo basenateri.

Yagize ati “habayeho gushishikariza abafitanye ibibazo cyane cyane abagize uruhare mu kwangiza imitungo y’abandi kwishyura hatabayeho guteza cyamunara ibyabo kandi ibyo byagiye bitanga umusaruro ndetse nubu biracyakomeje”.

Perezida wa komisiyo ya politike n’imiyoborere myiza muri Sena, Senateri Mushinzimana Appolinaire, yavuze ko bishimiye umusaruro watanzwe n’inkiko Gacaca mu karere ka Bugesera nubwo kashegeshwe cyane na Jenoside yakorewe Abatutsi.

“ndasaba abaturage n’abayobozi gusobanukirwa itegeko ryo mu mwaka wa 2012 rikuraho inkiko Gacaca rikanagena uburyo bwo gukemura ibibazo byari mu bubasha bw’inkiko gacaca”; Senateri Mushinzimana.

Abasenateri bagaragarijwe ko amadosiye y’inkiko Gacaca ari mu maboko ya komisiyo ishinzwe kurwanya Jenoside bityo bitoroshye kuyabona mu gihe bibaye ngombwa.

Egide Kayiranga