Iyo modoka ngo yavuye mu mafaranga bari barashyize hamwe na bagenzi be bunganiwe n’umwami Rudahigwa kugirango bazayikoreshe ubucuruzi bugamije inyungu.

Ubwo Papa Piyo yagabiraga impeta y’ubutore umwami Mutara III Rudahigwa nk’igihembo ko yinjije Abanyarwanda benshi muri Kiliziya Gatulika; Rudahigwa yashatse abazahimbira Kiliziya igisigo.

Umwe mu begukanye igihembo ni Nshokeyinka wari umusizi maze umwami Rudahigwa amuhemba amafaranga ibihumbi 18000.

Kubera ko icyo gihe nta bindi byabyaraga amafaranga umwami yamugiriye inama yo gushaka uburyo ayo mafaranga yakunguka atayashoye mu nka yari asanzwe acuruza. Rudahigwa yamusabye ko yashaka bagenzi be bagakora sosoyeti maze akabafasha kugura imodoka yo gukoresha mu bucuruzi.

Bakusanyije ibihumbi 127 ariko amafaranga aba make. Ni bwo babigejeje kuri Rudahigwa abemerera kubishingira maze bakazakora bishyura ayo mafaranga asigaye. Cyakora yabasabye kubanza gutora inzego zibahagarariye. Nshokeyinka wari waratsindiye igihembo cy’ubuhanzi aba perezida naho Muzehe Bihigifuku aba umubitsi w’ayo mafaranga.

Mbere yo kwerekeza ku isoko ry’imodoka, Umwami yabageneye amahugurwa y’iminsi ibiri ajyanye n’inshingano zabo no gucunga umutungo wagombaga kuzaboneka.

Bihigifuku ari kumwe n’umwishingizi wari woherejwe na Rudahigwa berekeje i Bujumbura kugura iyo modoka baza bikoreye ibyuma byateranyijwe mu minsi itandatu imodoka iba nzima.

Babuze urwunguko imodoka isubirana ba nyirayo

N’ubwo umwami yari yabahuguriye gucunga umutungo wabo ntibyabahiriye kuko nyuma yo kuzana iyo modoka yari kuzakora ubucuruzi babuze ibiraka.

Ngo umwami yari yarabatereteye ikiraka cyo kwikorera amabuye y’agaciro yacukurwaga na sosoyete y’ubucukuzi bw’amabuye y’agaciro (SOMUKI) ariko nyuma ngo baje gusanga umuzungu wayoboraga SOMUKI yarisubiyeho avuga ko nta modoka y’umwirabura ashaka ko izatunda amabuye ya sosoyete ye; icyo kiraka baba barakibuze.

Muzehe Bihigifuku utibuka umwaka ibyo byabereyemo avuga ko icyo gihe nta modoka zari mu Rwanda ndetse n’imihanda yari itaraboneka.

Bakomeje gushaka aho bakura ubwishyu bw’umwenda barimo baza kubona ikiraka cy’amezi abiri cyo gutunda inkwi bazivana mu ishyamba rya Gishwati. Iki kiraka bari baragihawe na Shefu kamuzinzi watwaraga u Bugoyi icyo gihe.

Nyuma yo kurangiza icyo kiraka imodoka yabuze akazi umwenda na wo usatira ayaguze iyo modoka. Ababagurishije iyo modoka babonye ko kwishyura bigoranye barayisubiza nuko ubucuruzi bw’iyo modoka burangirira aho.

Muzehe Bihigifuku avuga ko bahombye kubera ko icyo gihe ibiraka byabonekaga byabaga bitangwa n’abazungu kandi bitoroshye kuhabona akazi uri umwirabura. Avuga ko nyuma yo guhomba buri wese yagiye mu bye kuko sosiyete yabo yari imaze guhomba.

Ernestine Musanabera