Nyirarukundo Muhawenimana avuga ko imirimo bari barimo yo guhora bahingiririza kugira ngo baramuke ngo itagira icyo ibagezaho kandi ngo ntituma abana babo bataburara kandi bitwa ngo bakoze, ibyo ngo byatumaga batekereza gutaha ariko bagacibwa intege na FDLR kuko ngo bababwirako bagiye gupfa.

Ibi byagarutsweho n’umusaza Mushokambere wimyaka 63 aho avuga ko FDLR ikomeje kubera imbogamizi abifuza gutahuka kubera gutinya ko bazasigara bonyine mu mashyamba.

Aba Banyarwanda batangaza ko imibereho yabo yari iteye agahinda kuko ngo abana babo batiga ndetse ngo bagakoreshwa n’imirimo y’ingufu batarageza igihe.

Aha aba bagabo bavuga ko urubyiruko rwinshi rwinjizwa mu gisirikare cya FDLR kandi bakiri bato , nyamara ngo bategereje umusaruro bibaha baraheba.

Aba batahutse bavuga ko nta cyiza bigeze babonera muri Congo n’abakiriyo ari amaburakindi kuko ngo nta mahoro bafite kuko ngo bahora mu ntambara.

Aba Banyarwanda batahutse barimo abagabo 3, umugore 1 n’abana 6 bakaba bavuye muri zone za Karehe na Jwi.

Musabwa Euphrem