Agatabo ka banki uyu mugabo akoresha kuri My SACCO ya Munyiginya kagaragaza ko tariki 18/12/2012 yari afiteho amafaranga 1,212,800 ariko yasubira kuri My SACCO kuwa 07/02/2013 bakamubwira ko hasigayeho amafaranga 6,800 kandi avuga ko atigeze abikuza ifaranga na rimwe.

Kuva uwo munsi kandi, Habyarimana amaze gufungwa inshuro eshatu, kuko iyo atangiye gukurikirana iby’aya mafaranga ngo abakozi b’iyo SACCO Munyiginya bafatanya n’Umunyamabannga Nshingwabikorwa w’umurenge wa Munyiginya bakamufungira mu nyubako y’umurenge cyangwa bakamufungisha kuri station ya Polisi iri mu Kigabiro muri Rwamagana.

Habyarimana n’agatabo agaragaza nk’ikimenyetso ko yambuwe utwe.

Mu gihe Habyarimana avuga ko abakozi b’iyo SACCO bakoresheje uburiganya mu kurigisa aya mafaranga ye ariko, Emy Manzi uyobora My SACCO ya Munyiginya avuga ko uwo mugabo ngo yakoresheje amayeri yo kubikuza amafaranga ye ku gatabo ka banki atagikoresha, kuko ngo bamuhaye udutabo twa banki tubiri.

Bwana Emy Manzi ati “Habyarimana yaterefonnye umukozi wa SACCO amubwira ko agatabo yakoreshaga katakaye, asaba ko bamukorera akandi. Aka ka kabiri yakoresheje niko yabikurijeho amafaranga ye miliyoni n’ibihumbi magana abiri (mu byiciro bibiri) hanyuma arongera agarukana agatabo yavugaga ko katakaye kandi ko kagaragaramo ko atigeze abikuza ya mafaranga.”

Ibi ariko Habyarimana abihakana yivuye inyuma, akavuga ko ari ubwambuzi abakozi ba SACCO abitsamo bamukoreye. Habyarimana ati “Abakozi b’iyi SACCO barabeshya kuko sinigeze nsaba agatabo ka kabiri, dore ko bavuga ko ngo nagasabiye kuri telefoni kandi abanyamuryango bose bazi ko abakozi batajya bemera imikorere nk’iyo. Iyo utahigereye nta serivisi wasaba. Babikuje amafaranga kuri konti yanjye, ahubwo babura uko banjijisha ngo babyandike no mu gatabo.”

Umuyobozi wa SACCO Munyiginya iburyo n’Umunyamabanga Nshingwabikorwa w’umurenge wa Munyiginya.

Ifishi ya konti ya Habyarimana isigara muri SACCO igaragaza ko Habyarimana yabikuje amafaranga 901,000 kuwa 08/01/2013 akanabikuza andi 305,000 kuwa 10/01/2013 akanabisinyira, ariko mu gatabo akoresha iyo mibare ntiyigeze yandikwamo, ahubwo umukozi wa SACCO Munyiginya yayanditsemo kuwa 07/02/2013 ariko ntiyabisinyira nk’uko bisanzwe ndetse n’uwabikuje ntaho bigaragara ko yasinye ayabikuza.

Kuva ubwo ariko Habyarimana yabuze uwo aregera kuko ngo uwo munsi yafungiwe ku murenge umunsi wose, bukeye bamufungira kuri Polisi ya Kigabiro aho yafungiwe iminsi itatu. Aho afunguriwe, bamwohereje kureba Umunyamabanga Nshingwabikorwa w’umurenge ngo amufashe kubona amafaranga ye.

Habyarimana yabwiye Kigali Today ko umunyamabanga Nshingwabikorwa yongeye kumuta muri yombi, agasaba abitwa local defense ko bamusubiza gufungirwa kuri Polisi. Uyu munyamabanga Nshingwabikorwa wa Munyiginya witwa Semahoro Guy yabwiye Kigali Today ko basabaga ko Habyarimana afungwa kuko ari umujura ukoresha amayeri mu kubona indonke.

Bwana Semahoro ati “Ahubwo njye birantungura cyane iyo mbona agaruka mu baturage kandi ari umunyamayeri ushaka kugwiza amafaranga mu buryo bufifitse.”

Icyicaro cya My SACCO ya Munyiginya.

Habyarimana arasaba ko inzego nkuru kuruta Umurenge na SACCO ya Munyiginya zamufasha kubona amafaranga ye nk’uko agatabo ke akoresha kabigaragaza, ngo naho ifishi yo abakozi ba SACCO bayikoreyeho ubujura kandi akeka ko baba baraniganye umukono we, bagasinya mu mwanya we ko yabikuje ariya mafaranga kuko ngo iyo fishi bayihorana.

Abashinzwe kugenzura ibigo by’imari muri Banki Nkuru y’u Rwanda bavuga ko bataramenya icyo kibazo, naho Habyarimana Gilbert ushinzwe gukurikirana imikorere ya SACCO mu kigo cy’igihugu gishinzwe amakoperative (RCA) avuga ko atari abizi, ariko ngo yiyemeje kohereza abagenzuzi muri iyo SACCO ya Munyiginya ngo bacukumbure ukuri kw’ubwo bujura.

Habyarimana Gilbert yavuze ko RCA yari itaramenya abakora amakosa nk’ayo, ariko ngo abakozi ba SACCO baramutse bagaragaweho amakosa nk’ayo, bahagarikwa ku kazi, ubundi bagashyikirizwa ubutabera bugakurikiza amategeko. Kigali Today ntirabona umunyamategeko ngo imenye uko uwo munyamuryango yahanwa abaye koko yarakoresheje udutabo tubiri mu kubikuza.

Bamwe mu baturage b’i Rwamagana bavuga ko muri iyo SACCO ya Munyiginya higeze havugwa nanone umunyamuryango wasanze baramwanditseho ko yabikuje ibihumbi 350 kandi adaherutse kuri SACCO, ariko ngo abakozi ba SACCO baje kuyasubiza kuri konti ye ubwo uyu munyamuryango yavugaga ko agiye kubishyikiriza inzego z’ubuyobozi.

Ahishakiye Jean d’Amour