Muri uyu muhango wabaye ku gicamunsi cyo kuwa 13/03/2013, Prof. Anastase Shyaka, uyobora RGB, yatangaje ko iki kigo cyagira ngo cyemeze ko bujuje ibyangombwa basabwe kuba batanze mu kwezi bari bahawe.

Yagize ati: “Iri tegeko ngenga ryasohotse mu kwezi gushize riteganya ko imitwe ya politiki yari isanzwe yemewe mu Rwanda mu gihe kitarenze ukwezi iba yahuje amategeko yayo n’iryo tegeko ngenga.

Uyu munsi rero uyu muhango wari uwo kurebera hamwe niba imitwe ya politiki nk’uko iryo tegeko ngenga ribiteganya yarashyikirije RGB amategeko yayo ahujwe n’iryo tegeko ngenga.”

Amashyaka yose kandi yemeza ko iryo tegeko ngenga N0 10/2013/OL rigenga amashyaka ya politiki n’abanyapolitiki, nta kibazo ribateye kuko aribo baryitoreye, bakoresheje ababahagarariye mu nteko.

Prof Shyaka, umuyobozi wa RGB mu muhango wo gushyikiriza certificat ku mashyaka 11 yemewe gukorera mu Rwanda.

Zimwe mu ngingo zirigize zatega impungenge, ni nk’aho bavuga ko nta mutwe wa politiki wemerewe kwakira impano cyangwa inkunga iturutse mu mahanga, mu bigo bishamikiye ku banyamahanga cyangwa mu bigo bya Leta.

Gusa abahagarariye amashyaka bemeza ko nta kibazo bibateye kuko mbere yo kuritora habanje kuba impaka zihagije mu nteko ishinga amategeko, nk’uko byemejwe n’uwitwa Thierry Karemera, wari uhagarariye PPC.

Yatangaje ko amashyaka yitwa ko ariyo adafite ubushobozi ariyo yafashe iya mbere mu gushyigikira icyo gitekerezo. Yatangaje ko babikoze mu rwego rwo gushyigikira umuco wo kwigira.

Biteganyijwe ko amashyaka yemewe gukorera mu Rwanda azajya atungwa n’imisanzu iva mu bayoboke bayo. Itegeko rigena kandi ko hazajya habaho igenzuramari rigamije kugaragaza imikoreshereze y’amafaranga n’inkomoko y’ayo mafaranga amashyaka akoresha.

Emmanuel N. Hitimana