Mu matora yabaye kuri uyu wa kabiri tariki 21/8/2012 muri sitade y’akarere ka Gicumbi uwo mwanya yawuhataniyeho na mugenzi we Niyoyita Houssen Zuberi amurusha amajwi menshi cyane. Mvuyekure Alexandre yagize amajwi 339 naho mugenzi we bahataniraga uwo mwanya agira amajwi 47.

Mvuyekure Alexandre yari umuyobozi w’akarere ka Gicumbi wungirije ushinzwe ubukungu, ariko akaba yari amaze ibyumweru bibiri yeguye kumwanya w’ubuyobozi ku mpamvu ze bwite.

Yagaragaye mu matora y’abakandida biyamamarizaga umwanya w’umuyobozi w’Akarere ka Gicumbi.

Muri aya matora kandi hatowe n’umuyobozi w’akarere wungirije ushinzwe ubukungu kuko Mvuyekure Alexandre yari yareguye kuri uwo mwanya.

Uwegukanye uwo mwanya ni Kagenzi Stanislas wagize amajwi 277 naho mugenzi we Umutesi Jacqueline bahatanaga agira amajwi 110.

Nyuma yo kurahira, umuyobozi mushya w’akarere ka Gicumbi, Mvuyekure Alexandre, yavuze ko agiye gushakisha icyafasha akarere gutera imbere mu rwego rw’ubukungu, gutunganya umujyi wa Byumba no kugeza amazi meza n’amashanyarazi ku baturage batarayabona.

Yasabye izindi nzego z’ubuyobozi gufatanya bagakorana neza ndetse ashimira abayobozi barimo kuyobora muri iki gihe cy’inzibacyuho. Yavuze ko imirimo yari yaratangiye yo kwikorera ku giti cye no gukomeza amashuri ye ayihagaritse kuko asanga atayifatanya n’inshingano ze ngo byombi bitungane.

Uwatorewe umwanya w’umuyobozi w’Akarere wungirije ushinzwe ubukungu, Kagenzi Stanislas, nawe yijeje abari mu matora ko azabagararagariza icyizere yagiriwe abishyira mu bikorwa kandi ko azafatanya n’abayobozi bari basanzwe bayobora kandi akazatunganya inshingano ze nk’uko yabyiyemeje.

Guverineri w’Intara y’Amajyaruruguru, Bosenibamwe Aime, yasabye abayobozi batowe gukorana neza ndetse bakagira ibyo bahindura bagatunganya n’ibindi bitagenze neza muri ako Karere bagerageza kubishyira mubikora aho babona bitabashobokeye bakabwira abandi bakabibafasha.

Ernestine Musanabera