Sergent Havugimana watahutse mu Rwanda tariki 06/12/2013 akomeza kuvuga ko mu ishyamba ari mu gihuru bityo akaba abona kukigumamo ari ntaho byazamugeza dore ko kuva yagera muri FDLR ngo nta kintu na kimwe yigeze ageraho usibye guhangayika mu miserero y’intambara zitarangira.

Premier Soldat Bizimana Claude hamwe na begenzi be bo bavuga ko ngo bari bamaze kurambirwa no kuba mu mashyamba ya Congo ntacyo bayatoramo aho bumvaga bifuza kugaruka iwabo.

Aba basirikare bavuga ko kuba ngo bahozwa mu ntambara zitafite intego kubera inyungu za bamwe bituma bacika intege bityo bigatuma abenshi bafata ingamba zo kugaruka iwabo. Abakiri mu mashyamba bitwaza ko batazi neza amakuru y’u Rwanda ngo ni ibinyoma kuko ngo baba bafite amakuri y’igihugu cyabo mu buryo buhagije.

Aba basirikare barakangurira bagenzi babo basize mu mashyamba kuva yo kuko ngo basanze barasigaye inyuma bakurikije uko basanze igihugu cyarateye imbere, ngo kuguma kwiruka inyuma y’abayobozi ba FDLR kandi ari ntacyo babamariye ngo ni ukwitesha agaciro kuko ngo nibaramuka babishinze bazapfa badateye imbere, kuko ngo nta terambere ry’ishyamba.

Aba basirikari bavuga ko bishimye bidasanzwe kuba bongeye gukandagira ku butaka bw’igihugu cyabo kuko ngo bahoraga babyifuza kenshi ariko ntibishoboke.

Kuba bageze iwabo kandi ngo bagasanga Abanyarwanda baravuguruye igihugu cyabo ngo nabo baje gushiraho imbaraga zabo bafatanya nabo basanze gukomeza kucyubaka.

Musabwa Euphrem