Gahunda z’ubudehe, Girinka n’izindi zigenerwa abantu batishoboye na zo ngo zizabageraho kuko bakeneye kwiyubaka bakiteza imbere. Buri muntu muri aba batashye mu Rwanda kandi yahawe ibahasha irimo ibihumbi 600 by’amafaranga y’u Rwanda yo kumufasha gutangira ubuzima no kwihangira umurimo uzamubeshaho.

Guverineri Bosenibamwe yagize ati: “ … Ndagira ngo mbizeze ko mugiye gusubira mu mirenge yanyu mu turere twanyu kandi mu izina rya Leta reka mbizeze ko muzabaho neza, muzahabwa ubufasha, muzashyirwa muri gahunda za Leta zose zizamura imibereho y’Abanyarwanda. Muri Abanyarwanda batashye iwabo, ntabwo muzasigara inyuma.

Nta muntu n’umwe uzabita Interahamwe, nta muntu n’umwe uzabita Abacengezi. Abo musanze bose bazabite Umunyarwanda.”
Yabasabye gufatanya n’abandi Banyarwanda kubaka igihugu, bagira uruhare mu gucunga umutekano hamwe n’abandi baturage kuko umutekano ari ishingiro rya byose u Rwanda rwagezeho n’ibyiza ruharanira.

Umuyobozi w’Intara y’Amajyaruguru yashimye abo bafashe icyemezo cyo kwanga gukomeza kuba ingwate z’abayobozi ba FDLR n’indi mitwe irwanya u Rwanda, bakaza kubaka igihugu cyabo, yongeraho ko ari byiza ko bakangurira bagenzi babo basigaye nabo bakaza gufatanya n’abandi mu kubaka igihugu cyabo.

Na none kandi yavuze ko u Rwanda ari igihugu gishyize imbere kandi giharanira amahoro mu karere rurimo, aboneraho gusaba ingabo z’Umuryango w’Abibumbye gishinzwe kugarura Amahoro muri Kongo-Kinshasa, ingabo ziswe MONUSCO, kongera imbaraga mu guhashya umutwe wa FDLR aho kuyobya uburari.

Abasore n’abagabo, abenshi bari hagati y’ikigero cy’imyaka 20 na 35 bari babambaye imipira y’imyeru, bacyeye ku maso bakacishagamo bakagaragaza ibyishimo byabo bacinya akadiho, bishimiye ko basubiye mu buzima busanzwe bitwaje impamba y’ubumenyi n’amafaranga yo gutangiza imishinga iciriritse.

Sayinzoga Jean ukuriye Komisiyo yo gusezerera no gusubiza mu buzima busanzwe abari abasirikare, yabwiye abitabiriye ibyo birori byabereye mu kigo cya Mutobo mu karere ka Musanze ko bamaze amezi atatu bigishwa gusoma no kwandika, kuko barimo benshi batari babizi kuko bakiri mu mashyamba batabonye uko biga.

Ikindi, bahuguwe ku bijyanye no kwihangira imirimo ngo bagire ubumenyi bw’ibanze buzabafasha kwirwanaho bageze hanze, bagakora bakiteza imbere bo ubwabo ndetse n’igihugu cyabo muri rusange.

Gutahuka mu Rwanda bavuye mu mashyamba ya Congo ngo ntibiborohera. Iyo FDLR na FARDC bagize uwo bafata atashye bahitaga bamwica kugira ngo bibere abandi isomo. Ngo hari abantu benshi bafashwe bugwate n’abayobozi ba FDLR kugira ngo batazisanga ari bonyine kuko bo bafite ubwoba bwo gutaha batinya ko babazwa ibyaha basize bakoze.

Munyaneza Charles wavuze mu izina ry’abandi, yemeza ko Leta ya Kongo ifasha FDLR. Yasabye ariko ibyo bihagarara, aho yagize ati: “Reka nsabe Repubulika iharanira Demukarasi ya Kongo guhagarika inkunga iha FDLR irimo imbunda. Reka nsabe Repubulika iharanira Demkarasi ya Kongo na MONUSCO kwambura intwaro FDLR.”

Uyu Munyaneza yijeje ko ubumenyi bakuye i Mutobo buzabagirira akamaro aho bagiye iwabo bakazabubyaza umumaro. Abantu 76 ni bo basezerewe mu cyiciro cya 49, umuhango witabiriwe n’abashyitsi batandukanye barimo ambasaderi w’u Buholandi mu Rwanda, abahagarariye imiryango nka MONUSCO, ikigo cya leta y’Ubuyapani giharanira iterambere mpuzamahanga JICA, Banki y’Isi n’abandi.

Nshimiyimana Leonard