Imibare igaragaza ko abayobozi bagera ku 10% batse ruswa igitsina gore bakoresha cyangwa abaje kubaka akazi, nk’uko bitangazwa na Marie Immaculee Ingabire, umuyobozi wa Transparency Rwanda.

Umuyobozi wa Transparency Rwanda atanga ikiganiro ku bushakashatsi bakoze kuri ruswa ishingiye ku gitsina.

Agira ati "Twasanze abarenga 7/10 ari abadiregiteri. Ni abayobozi kuko nibo bafite bwa bubasha. Abandi n’uwaba abyifuza nta bubasha agufiteho umwangiye ntacyo yagutwara. Ariko abayobozi umwangiye byakugira ho ingaruka.

Turasaba niba ari muri Leta bajye bamenya abayobozi b’inyangamugayo. N’umuntu nagaragara ko atari inyangamugayo niyo yaba ari umuhanga bingana iki agende, kuko ubunyangamugayo bugomba kuba kimwe mu byo baheraho. Ariko nibigera no mu bikorera nka hariya mu mabanki wagize ngo uri umugore wabona inguzanyo utaryamye?!!"

Umuyobozi wa Transperency Rwanda yakomeje avuga ko abo bayobozi bakora ibyo kandi baba bishingikirije ko batahanwa, kubera imyanya barimo cyangwa amashyaka barimo. Aboneraho no kwemeza ko no mu mashyaka icyo kibazo cya ruswa bafite ibimenyetso byemeza ko ihari.

Ibi biganiro byitabiriwe n’abanyamakuru batandukanye n’abandi bafatanya bikorwa mu gukumira ihohoterwa barimo Polisi y’igihugu.

Ingabire wari witabiriye ibiganiro byahuje abahagarariye ibitangazamakuru bikorera mu Rwanda na Minisiteri y’Uburenganire n’Umuryango (MIGEPROF), byabaye kuri uyu wa Kane tariki 16/1/2014, yatangaje ko gusa hari icyizere ko bizagenda bigabanuka.

Ibyo yabishingiye ko amakuru akomeza kugenda atangwa, ahagaragara ibyo bibazo hakamenyekana n’ubwo gufata ibimenyetso bikigoranye kuko ari icyaha gikorerwa mu bwihisho.

Emmanuel N. Hitimana