Ni amahugurwa yasojwe na Minisitiri w’Ubutegetsi bw’Igihugu, Jean Claude Musabyimana, ku ya 20 Ukuboza 2023.

Bimwe mu biganiro bahawe, harimo igifite insanganyamatsiko igira iti “Ibifasha gutanga umusaruro mu nshingano zigoye”, gikubiyemo inyigisho zijyanye no gutanga amabwiriza asobanutse ku bo bayobora, gukoresha neza ikoranabuhanga, kumenya gutuma abakozi no gukoresha abo bafatanya, kugena umwanya wo kwiyitaho no kwita ku miryango yabo n’ibindi.

Bahawe kandi ikiganiro kuri gahunda nshya ya Guverinoma yo gufasha imiryango itishoboye mu kwikura mu bukene (Kora Wigire), bahugurirwa imikorere n’imikoranire y’Inama Njyanama na Komite Nyobozi z’uturere, basobanurirwa n’uburyo ubukangurambaga bukorwa n’imikoranire n’urubyiruko rw’abakorerabushake.

Ku munsi wa gatatu w’ayo mahugurwa ari na wo wabereyemo umuhango wo kuyasoza, abo bayobozi bitabiriye amahugurwa bahawe umwanya wo kuganira basangira ubunararibonye, bwabafasha kuzuza inshingano batorewe.

Mu bitekerezo bagiye batanga, bagarutse cyane ku nshingano batorewe, bemeza ko bagiye guharanira kuzuzanya bageza abaturage bashinzwe ku iterambere n’imibereho myiza, ariko bita no ku miryango bavukamo.

Mukamana Vestine uherutse gutorerwa kuyobora Akarere ka Gakenke ati “Ndi mushya mu nzego z’ibanze ariko ntewe ishema n’icyizere nagiriwe. Mbere yo kuza mu nzego z’ibanze, abantu bakubwira byinshi baguca intege, ariko ntidukwiye gutinya inshingano twatorewe. Igihugu cyacu nta wundi uzagikorera utari twe”.

Na ho Mukase Valentine, Umuyobozi mushya w’Akarere ka Karongi ati “Nka Mutimawurugo, n’ubwo ndi umuyobozi w’Akarere, n’inshingano mfite mu rugo nk’umubyeyi kandi nk’umugore ndazubahiriza neza, kandi ntibyice inshingano z’akazi Igihugu cyanshinze. Mu byo dukora byose ntitwibagirwe n’imiryango yacu”.

Ku munsi wa kabiri w’amahugurwa, abayitabiriye bahawe ikiganiro kuri politiki yo kwegereza abaturage ubuyobozi.

Abo bayobozi beretswe ingamba bakwiha zikabafasha kuzuza neza inshingano, ari zo Kumenya icyerekezo cy’Igihugu no kugihuza n’iterambere rijyanye n’Akarere, Gushyira imbere inyungu z’umuturage bamukemura ibibazo ku gihe, Gusangira amakuru n’abo bakorana, Kwimakaza imikorere n’imikoranire myiza, Gukorera hamwe nk’ikipe, Kumenya abaturage bayoboye no gukorana nabo.

Mu zindi ngamba, harimo Gukorana neza n’abafatanyabikorwa, Kwirinda amacakubiri, Kurwanya akarengane na ruswa, Kugira ikinyabupfura n’ubunyangamugayo, Kwirinda kunyereza ibya rubanda, Kwigirira icyizere, Kudaheza abakozi, Guhanga udushya n’izindi.

Ayo mahugurwa y’Abagize Njyanama baherutse gutorerwa kuzuza Inama Njyanama z’Uturere twa Rubavu, Rutsiro, Karongi, Nyamasheke, Burera, Musanze, Gakenke, Rulindo na Rwamagana n’abagize Komite Nyobozi zatwo, yatangiye ku itariki 18 asozwa ku ya 20 Ukuboza 2023.