Aba bayobozi bavuga ko kugera ku baturage ngo babahe serivisi bikiri imbogamizi, kuko bibasaba kwikora ku mufuka ngo babashe kujya gukiranuba abagiranye ibibazo, nk’uko babitangarije mu nama baherutse kugira n’abayobozi.

Abayobozi basanga boroherejwe mu ngendo bahabwa amagri byarushaho kubafasha mu kazi bakorana ubwitange badahembwa.

Rubagumya Appolinaire umuyobozi w’umudugudu wa Gituku wo mu murenge wa Rukira, yagaragaje imbogamizi z’ingendo abayobozi b’imidugudu bagira yaba igihe bagiye mu nama ku mirenge cyangwa gutanga service ku baturage,usanga zibahendamu gutega.

Yagize ati “Twese ntago ariko duturanye n’imirenge cyangwa utugali,hari ubwo tujya mu nama bikaduhenda kubera amatike kandi ntiduhembwa ugasanga biratugora,ntakuntu mwazatubonera akagari? Mwazadutekerezaho.”

Umuyobozi w’akarere ka Ngoma,Nambaje Aphrodise, yavuze ko hari ibyo igihugu kigenda kibafashamo harimo kubishyurira ubwisungane mu kwivuza. Avuga ko biterwa n’amikoro aba ahari ko bazirikana akazi kabo gakomeye,no gukorana ubwitange bagira.

Ati “Abantu bazakomeza kubyigaho uko ubushobozi buzagenda buboneka nibyakunda,imisoro yacu y’akarere uko ubushobozi buzazamuka hazarebwa icyakorwa cyabafasha si ukuvuga ko abantu babibagiwe tuzirikana akazi kanyu gakomeye mukora.”

Akarere ka Ngoma kugera ubu kagizwe n’imidugudu igera kuri 473, bivuze ko bibaye impamo ariyo yashakirwa ubushobozi burimo no kubonerwa amagari abafasha mu ngendo.

Jean Claude Gakwaya